KUCHING: Saup komuniti China ba Sarawak mengkang signifikan nyadi penyungkak pemansang ekonomi rama enggau budaya nengeri tu.
Pekara nya dipadah Sapit Premier Sarawak, Datuk Amar Douglas Uggah Embas nengah pesan khas serimbai Taun Baru China 2026.
Ku iya, komuniti China udah lama nyadi entara pugu besai pemansang nengeri nengah sektor dagang, pelajar sereta tuai komuniti.
"Komuniti China udah lama nyadi pugu besai pemansang ekonomi, rama enggau budaya Sarawak.
"Pemansang ba bidang dagang, pelajar enggau tuai komuniti majak tegap enggau nyungkak pemansang nengeri tu," ku iya.
Ku iya, pengerami baka Taun Baru China ukai semina tradisyen budaya, tang mega nyadi pelasar pemadu manah mekuh semangat beserakup enggau pengelantang entara rayat pupu bansa.
"Nengah pengerami ngelalu pengabang lalu berami begulai, kitai ngerapit kaul sereta meransang semangat begulai nyadi siti ruang bilik besai Sarawak," ku iya.
Nambah ke nya, iya ngelalau semua rayat terus seati enggau begulai seraris enggau semangat Taun Kuda Api ti mandangka pemerani, pengeliat ati enggau jauh tinjau penemu.
Ku iya, semangat nya beguna amat nentuka pejalai Strategi Pemansang Pengudah COVID-19 2030 (PCDS 2030) mujur dipejalai lalu mai Sarawak nuju pengelantang inklusif enggau pemansang ti meruan. – EDISI UKAS
