Pengawa nyua chek nya udah dipenyadi Kaban Kunsil Nengeri (ADUN) Daro, Dr. Safiee Ahmad ba Gerija BEM (SIB) Nangar Kecil, ditu kena Hari Minggu enggau penatai urung 100 iku.
Lebuh bejaku, iya meri terima kasih ngagai Perintah Sarawak ti mandangka pengeran nengah UNIFOR nyaup nyeruri rumah sembiang pengarap bukai lalu ngedut penyerakup entara pengarap ba nengeri tu.
“Belanja ti diagih deka dikena bejalaika projek mit ti meri empas besai baka nyeruri laman gerija, ngemanah perengkaguna sereta ngemanah rumah sembiang ungkup pengelantang enggau pengelikun raban gerija," ku iya.
Iya nyemetak madah ke rumah sembiang ukai semina nyadi palan besembiang tang mega nyadi palan penyerakup, pengelantang enggau pemansang rama komuniti lokal.
Kelimpah ari pemansang fizikal, iya mega ngemerat pemesai guna pemansang modal mensia kelebih agi entara nembiak enggau volunteer gerija ngambi institusyen nya terus mansang enggau nyadi palan ngaul komuniti.
Iya mega madah, UNIFOR nyadi bukti nyata pengelantang sereta bebasaka pangan diri entara jalai pengarap ba Sarawak ti patut dijaga sereta ditegap ke pengelantang rebak dudi.
Berebak enggau nya, iya meri jamin deka terus nyukung peminta rumah sembiang ba Daro seagi meri pemaik ngagai rayat. -EDISI UKAS
