Yang di-Pertua Negeri Sarawak & Bini Ngulu Latih Nimbak Ba PULAPOL
KUCHING: Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar begulai enggau bini, Toh Puan Datuk Patinggi Fauziah Mohd Sanusi ngulu latih nimbak diatur Polis Diraja Malaysia (PDRM) Kontinjen Kuching di Palan Latih Polis (PULAPOL) Kuching, kena Hari Satu.
Penatai seduai pukul 10 pagi diambat Kepala Polis Sarawak Datuk Mohamad Zainal Abdullah, Tuai Polis Pelilih Kuching ACP Alexson Naga Chabu sereta pegawai kanan PDRM ke bukai.
Program dipun enggau pengawa meri penerang bekaul pengelikun enggau chara ngena senyata api ti dikenatai Pegawai Turus Persenjataan, Opis Logistik enggau Teknologi Indu Polis Kontinjen (IPK) Sarawak, DSP Zaidi Said ti mega ngatur latih nya.
Maya nya, Tun Pehin Sri Dr Wan Junaidi enggau Toh Puan Datuk Patinggi Fauziah ngulu latih kategori ‘centre-fire’ enggau ‘falling plate’ begulai enggau Kepala Polis Sarawak sereta pegawai kanan.
Ku ACP Alexson Naga, bisi 20 pegawai nyengkaum pegawai kanan lelaki enggau indu ngambi bagi ba latih keterubah nya nentuka tikas pengelandik sereta kompetensyen ngena senyata api semampai ba tikas ti manah.
Pengudah tembu belatih, Yang di-Pertua Negeri Sarawak enggau bini mega merarau sebedau nyain keretas dikena sekumbang pengawa nimbak nya.
Latih besejarah ti keterubah diatur begulai enggau Yang di-Pertua Negeri Sarawak nya tembu enggau pengawa begambar ungkup kenang sebedau mupuk pulai. -EDISI UKAS
