Taun Baru China 2026 Ngempung Rayat Sarawak, BCCK Richah Enggau Semangat Begulai
KUCHING: Mensia mayuh bededat ba Palan Konvensyen Borneo Kuching (BCCK) tumu pagi mai pengaga, pengadang enggau semangat baru serimbai Pengerami Ngintu Taun Baru China Renggat Sarawak 2026 ti diatur enggau richah kena Hari Dua.
Pengerami ti digulu Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar begulai enggau bini, Toh Puan Datuk Patinggi Fauziah Mohd Sanusi ukai semina pengerami ninting taun, tang mega nyadi palan rayat pupu bansa begempuru nyadi siti ruang bilik besai Sarawak.
Pengawa ngatur pengerami renggat nengeri nya mandangka komitmen Perintah Sarawak bebendar nyaga pengelantang entara raban bansa sereta mekuh semangat beserakup ti nyadi pugu peneguh nengeri tu.
Penatai Tun Pehin Sri enggau Toh Puan diambat temuai dipebasa sebedau seduai meda bemacham pemerindang main asal, nyengkaum tanda singa ti narit ati, tebah gendang sereta pemerindang tradisyen ti mandangka pengaya pesaka asal komuniti China.
Pengerami ti ngempuru pupu bansa nya ukai semina richah enggau chura budaya tang mega sarat enggau reti begulai.
Maya richah berami, Tun Pehin Sri enggau Toh Puan mega ngena awak nya berandau enggau bala pengusung enggau ngaul rayat.
Ari pengerichah nya, sada rayat ti datai mega mandangka pengagit enggau temegah laban ulih datai ngagai pengerami nya.
Ku Joshua Amir Sibat, pengerami taun tu nyata mandangka semangat beserakup rayat Sarawak ti majak rat.
“Tumu pukul 9 pagi, pelaman udah dedat. Aku ngarap budaya baka tu ditan ngaul semua serak enggau pupu bansa. Tu mih gaya Sarawak ti patut dikemegah kitai,” ku iya.
Ba penemu Azizah Alwi , Pengerami Taun Baru China nyadi nalan ngempuru baru bakih lama enggau diri sebilik.
“Ba aku tu mih pengerami pemadu richah. Kitai ulih betemu enggau bakih lama sereta diri sebilik. Taun Baru China tu bekaul kitai begulai lalu ngerapit kaul enggau bakih bebida raban bansa.
Siku da pengusung, Abang Mukhriz madah ke pengerami nya peluang pemadu manah mereti enggau berati ke tradisyen raban bansa bukai.
“Tu siti tradisyen ti nyelai enggau narit ati ungkup selampur Sarawak laban kitai diuan pupu bansa. Aku ngarap tradisyen tu deka terus ditampung rebak dudi,” ku iya.
