KUCHING: Kimpin Taun Nemuai Ke Malaysia 2026 (VM2026) terus ditegap pengudah Padang Bilun Antarabansa Kuching (LTAK) ngerami penatai temuai nengah sambut ti chukup manah serimbai Taun Baru China seraya meransang pengawa ngelaku dagang temuai menua ba pintu penama Sarawak.
Padang Bilun Antarabansa Kuching (LTAK) ngerichah musin pengerami Taun Baru China nengah pengawa khas ngambat temuai nipak misyen ngemujur pengawa ngelaku VM2026.
Program diatur Tourism Malaysia nya mandangka pengelain lebuh temuai dipebasa ngambat temuai ba pintu penama sereta nyuaka ‘goodies bag’ kelai ngelalu pengusung ti datai kena Hari Dua.
Bela ngerichah pengawa nya, Sapit Sekretari Besai Sarawak, Mohamad Anuardi Hajani, Sekretari Mendam Opis Menteri Dagang Temuai, Industri Kreatif enggau Seni Pemerindang Sarawak, Morshidi Fredrick, pengari Malaysia Airports Holdings Berhad sereta pemekuh industri dagang temuai nyengkaum serikat penerebai Batik Air, AirAsia enggau Malaysia Aviation Group sereta pengari Sarawak Tourism Board, Sarawak Tourism Federation sereta Gerempung Homestay Sarawak.
Pengerami nya richah nengah simbolik ngirau Yee Sang ti mandangka penyerakup enggau pengelantang sereta pengawa mandangka tanda singa ti suah dipandang maya pengerami Taun Baru China.
Lebih manis, temuai mega bepeluang ngasai peneleba ngadu batik diatur Kraftangan Sarawak lalu nyagu penyelai seni pesaka asal ngagai bala temuai menua luar.
Maskot rasmi VM2026, Wira enggau Manja, mega mandangka pekayan besuluka jaku pengerami lalu bala temuai ti datai begambar dikena nambah peneleba.
Pengawa ngambat temuai ba pintu penama antarabansa nya entara inisiatif strategik nengah kimpin VM2026 dikena nambah peneleba penatai temuai, nyagu Malaysia nyadi menua ti likun lalu kaya enggau bemacham budaya sepanjai taun.
Inisiatif nya mega disadang meri empas positif ngagai temuai seraya meransang sida raun baru ke menua tu. –EDISI UKAS
Pemberita : Ezzah Syafiqah
Gambar : Ezzah Syafiqah, Shahril Haqim
