LAWAS: Rayat ditu diperansang sedia enggau ngena peluang pemansang ri deka dipejalai nipak mayuh projek infrastruktur enggau ekonomi ti dilanggur dikena nyungkak pemansang menua.
Kaban Parlimen Lawas Datuk Henry Sum Agong madah, sekeda projek benung enggau deka dipejalai ba Trusan nyengkaum nangkir jalai ngagai empat arung, ngaga siti da Jematan Trusan sereta Jematan Siang-Siang.
Pia mega, projek padang bilun baru, palan penyangkai kapal tasik dalam ba Kuala Lawas, numbuh Maktab Rendah Sains MARA (MRSM) sereta jalai Ba’kelalan ke adan menua Indonesia deka meri pemaik ekonomi ti besai.
“Pemansang deka dipejalai tang enti rayat nadai ngereja nama-nama lalu semina meda aja, peluang nya engka tebasau ngapa.
“Nya kebuah, kitai meseti sedia lalu ngena peluang nengah fasiliti dikemisi kitai dikena nyungkak ekonomi,” ku iya.
Iya madah munyi nya lebuh ngatur pengawa ngabang serimbai Pengerami Taun Baru China (TBC) ba rumah Penghulu Liaw Soon Teck, Trusan, kena Hari Dua.
Ku iya agi, pemansang infrastruktur meseti ditimbal enggau penyikap rayat ngambi ukai semina nyadi pemerati ngagai ubah ti nyadi.
Nambah ke nya, iya madah ke Pengerami Ngintu Taun Baru China ukai semina dirami komuniti Tionghua tang mega nyadi pengerami semua rayat Malaysia ti nyeremin pengelantang enggau penyerakup.
“Kitai beguna kerejasama baka tu ngambi kitai ulih bekerejasama entara pangan diri, ukai semina ungkup penyerakup tang mega ba sukut pemansang,” ku iya. - EDISI UKAS
