KUCHING: Program ngarang ninting taun diatur DayakDaily, D’Drift, datai baru ungkup edisyen ketujuh ti meri perati ngagai pengawa ngenang Jalai Tebing Tasik Sarawak nyadi pelasar ngangkatka kisah pesaka asal, legenda sereta pengidup komuniti lokal.
Pengawa ngelepas D’Drift 2026: Tracing Stories Along the Coastal Road udah dipenyadi Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Rahman Hamzah kena Hari Tiga.
Ku iya, pejalai ngabas enggau mereti ke peneleba ba endur asal ulih meri peragam enggau penemu ti besai reti ngagai pengawa ngelaku dagang temuai nengeri.
“Lebuh raban bekaul datai dia, sida nyepi pemakai asal, budaya enggau daya idup komuniti, udah nya dikarang ti mega nyadi chara promosyen autentik enggau nemban agi.
“Inisiatif tu ukai semina nyagu Sarawak ngagai temuai luar, tang mega nyaup rayat sereta komuniti ari nengeri bukai mereti ke bemacham pesaka asal dikembuan kitai,” ku iya.
Iya mega muji inisiatif nyelak bup asil ekspedisyen D’Drift sereta pengawa nyadung bup nya ngagai sekual enggau komuniti menua pesisir.
Iya madah baru, pengawa nya meri empas besai kelebih agi ngagai endur ti bisi tatak akses ngagai kereban bacha.
“Ukai semina endur bisi librari tauka kereban malin ti chukup. Pengawa nyadung bup ngagai sekula enggau komuniti menua pesisir ulih meransang minat macha sereta nambah penemu, nyengkaum ba menua ulu,” ku iya.
Sama datai ba pengawa nya, Sekretari Mendam Opis Menteri Dagang Temuai, Industri Kreatif enggau Seni Pemerindang Sarawak Morshidi Fredrick sereta Pemangku Tuai Pegawai Eksekutif DayakDaily Jason Tan. - EDISI UKAS
Pemberita : Ezzah Syafiqah
Gambar : Ezzah Syafiqah
