KUCHING: Sarawak andal deka nerima penatai lima juta temuai ungkup taun tu.

Menteri Dagang Temuai, Industri Kreatif enggau Dagang Temuai Sarawak, Dato Sri Abdul Karim Rahman Hamzah madah, taun sebedau tu, bisi 4,972,000 temuai dirikodka datai lalu tu mandangka pengulih industri dagang temuai majak mansang.

"Juluk ati deka nerima penatai lima juta temuai nya ukai ke baru digaga tang udah ditetapka kenyau beberapa taun sebedau tu lalu diatu majak ulih dikeamatka," ku iya madah ngagai media, Hari Tiga tu tadi.

Iya mega andal juluk ati nya ulih nyadi ketegal beberapa bengkah kebuah nyengkaum ketegal Air Borneo, pengawa ngatur Taun Nemuai Ke Malaysia enggau kalendar dagang temuai ti mayuh macham program di selampur Sarawak.

Ari nya mega, iya bela andal Sarawak ulih ngerikod urung 5.2 juta ngagai 5.5 juta temuai datai taun siti agi.

"Aku temegah amat ati meda industri dagang temuai Sarawak ke majak ngerembai mansang," ku iya madah baru.

Ba pekara bekaul, iya meri timbal ke manah ngagai pengawa deka ngaga hotel baru di Gala City ke disadang tembu taun siti agi ti bela nyerumba Sarawak deka nyadi tuai rumah ngatur Lumba SEA.

Ke penemu mayuh mega, taun siti suba, industri dagang temuai Sarawak ngerikod asil RM12.6 bilion ari dagang temuai ti nyadi sebagi ari pun penatai ekonomi nengeri.

Rikod bela madangka temuai ari Brunei enggau Indonesia pemadu mayuh lalu ditangkan Singapura, Filipina enggau China. – EDISI UKAS