BINTANGOR: Projek ngaga Tebing Sungai Bintangor beungkus RM35 juta sebagi ari pengawa deka nyungkakka agi pemansang Pelilih Meradong.

Kaban Kunsil Nengeri (ADUN) Meradong, Datuk Ding Kuong Hiing madah, projek ke digaga nengah Agensi Pemansang Delta Rajang (RADDA) nya disadang ditender tengan taun tu.

Ku iya, projek nya mega deka ngerandang pemansang baru di menua Bintangor.

Kelimpah ari nya, iya mega madah, beberapa iti projek bukai udah mujur tembu nyengkaum projek ngadu perengkaguna ba Palan Rekreasyen Bintangor ke beungkus RM4 juta, Kompleks Lumba Bintangor (RM3.5 juta) enggau penyangkai Bintangor (RM3 juta).

"Semua projek tu digaga ketegal kitai ngira pengelantang rayat, ngenegap projek pemansang seraya kitai bela meransang pengerembai ekonomi menua," ku iya madah.

Iya bejaku munyi nya maya Pengerami Taun Baru China 2026 ditu, Hari Tiga tu tadi.

Datuk Ding mega madah, siti balai mensia mayuh dua ringkat ke beungkus RM18 juta bela dilanggur digaga di Bintangor.

Kelimpah ari nya, langgur pemansang Bintangor bela nyengkaum ngaga jalai ari Jalai Kilang ngagai Jalai Janting beungkus RM8 juta, ngaga paip besai ari Jalai Kelupu ngagai Stesen Penggalak Tulai (RM10 juta) enggau ngemanah sistem retikulasi Pasar Bintangor (RM25 juta). -EDISI UKAS