MIRI: Sarawak Energy enggau kerejasama Gerempung Pengasih Raban Bini Menteri Sarawak (SABATI) udah meri sebuah mesin hemodialisis ngagai Hospital Miri dikena nambah kapasiti hospital ngambi tetangkupka servis perubat dialisis ti majak nambah di utara Sarawak.

Mesin nya udah diserah kena 7 Februari 2026 nengah program tanggungpengawa rama korporat (CSR) Sarawak Energy ba tuju Meranak Puku Komuniti, iya nya Pemansang Komuniti enggau Pengawa Dagang dikena nambah kereban perubat diguna ba fasiliti pengerai perintah selampur Sarawak.

Pengawa nyua pemeri nya dipenyadi Menteri Pengangkut Sarawak, Dato Sri Lee Kim Shin ke diterima Direktor Hospital Miri, Dr Jack Wong Siew Yu.

Sama datai Mandal Presiden Kanan Servis Korporat Sarawak Energy, Siti Aisah Adenan enggau Tukang Wang Dipebasa SABATI, Datin Siti Shorgayah Ahmad Zaidin.

Ku Siti Aisah, pesakit ti berubat dialisis, akses ngagai servis nya ukai semina kereban perubat aja, tang bisi kaul enggau pengawa berubat, nama enggau kualiti idup.

“Ari pemeri tu enggau kerejasama SABATI, kami arap ke ulih ngelempungka tating belanja pesakit enggau staf pengerai, kelimpah nentuka servis diguna tu ulih dilawa komuniti di Miri enggau genturung ngelingi,” ku iya.

Pemeri ngagai Hospital Miri nya sebagi ari agih belanja RM225,000 ti diberi Sarawak Energy ngagai SABATI enggau tuju meli mesin hemodialisis ungkup hospital di serata Sarawak.

Dulu ari nya, mesin hemodialisis udah diberi ngagai Hospital Lundu ba taun 2025 lalu mesin tambah deka dianjung ke hospital di Mukah, Bintulu enggau Sarikei dalam taun tu.

Ke penemu mayuh, kerejasama entara Sarawak Energy enggau SABATI ba pengawa ngintu pengerai udah belabuh kenyau ari Jun 2020 nengah pemeri mesin hemodialisis ngagai Hospital Kapit enggau Hospital Lawas.

Kenyau ari nya, Sarawak Energy terus ransing nyaup meri perengkaguna perubat di selampur nengeri nengah bemacham inisiatif nyengkaum mesin dialisis, mesin elektrokardiogram (ECG), ambulans, kereban fundoskopi sereta melanja beputung katarak di Kapit, Mukah-Balingian, Sungai Asap Belaga, Murum enggau Sri Aman.

Inisiatif rama Sarawak Energy digembar enggau empat batang pengawa Meranak Puku Komuniti, iya nya Pelajar enggau Raban Nembiak, Pengatur enggau Pengintu Rampa Menua sereta Ngintu Budaya enggau Pesaka sereta Pemansang Komuniti enggau Pengawa Dagang, seriris enggau pengawa kompeni negap pengelantang rayat Sarawak.-EDISI UKAS