Balai Bomba Tebedu Meseti Dirumban Berindik Ari Penusah Angus
TEBEDU: Penusah angus ti nyadi ba Kampung Entubuh empai lama matak perati mayuh raban betati ke pengelikun ba menua nya, lalu berunding ke Balai Bomba Tebedu patut dirumban dikena besikap ungkup timpuh panjai.
Kaban Kunsil Nengeri (ADUN) Tebedu, Dr. Simon Sinang Bada madah, taja penusah nya kes terubah nyadi kandang sepuluh taun dia, tang Balai Bomba didiri dia tetap beguna dikena nentuka tikas besikap ti meruan agi, kelebih agi Tebedu diatu benung deras mansang nyadi hab ekonomi baru.
Ku iya, perintah naka ulih nentuka pengelantang orang tasah terus diintu meruan lebuh sida dibantu Komiti Penyangga Penusah Bagi Menua Serian sereta Opis Pelilih Tebedu ti minta bantu ngentak rumah baru di baruh Bantu Pengasih Penusah (Angus).
Iya nyebut pekara nya pengudah ngatur pejalai ngabas endur penusah kena Hari Enam disempulang Pegawai Pelilih Tebedu, Gerard George Entigar, ngambi berati gaya sida ti tasah kelimpah nyua bantu tumu.
Ba penusah lemai Hari Tiga nya, sebuah rumah angus lengis, seraya dua da rumah angus urung 10 ngagai 20 peratus.
Kelimpah ari nya, Opis Pengintu Pengelantang Mensia Mayuh (JKM) Bagi Menua Serian mega meri bantu pemakai rangkai, kereban peninduk enggau ramu rumah ngagai sida ti tasah.
Berebak enggau nya, Dr. Simon nyemetak madah ke perambu ngaga Balai Bomba Tebedu kebendar udah dikemendar di baruh Langgur Pemansang Malaysia Lumpar Ke-11 (RMK-11) enggau RMK-12, tang diatu apin digaga.
