SELANGAU: Perintah Sarawak nengah Gabungan Parti Sarawak (GPS) terus ransing ngangkatka kualiti rumah peranak menua pesisir ari nyendiaka skim Jali Rumah Panjai penyampau RM50,000 sepintu ungkup peranak ti deka ngentak rumah panjai baru tauka nyeruri rumah ti bisi.

Kaban Parlimen Selangau, Edwin Banta madah, inisiatif nya dipejalai perintah belama nentuka rayat ba menua ulu bisi endur diau ti lantang enggau likun aja, seriris enggau agenda pemansang inklusif nengeri.

Ku iya, Parlimen Selangau nyadi sitak ti chukup mayuh mungkur lebih 840 buah rumah panjai, nya alai agih belanja pemansang diberi berenggat nentuka tetiap menua bulih pemaik ti patut, ti nadai dikelaung.

“Skim jali RM50,000 ba tetiap pintu nya entara pengawa perintah GPS mantu peranak ngentak tauka nyeruri rumah panjai ngambi lantang enggau meruan agi.

“Kitai nemu pemar ditapi peranak menua pesisir, laban tu bantu enggau agih belanja diberi berenggat ngambi semua sitak bisi peluang ngasai pemansang,” ku iya lebuh bejaku ba program Pengerami Mangkung Tiang di Rumah Panjai, Beruroh 1, Sungai Bawang, ditu, Hari Dua.

Iya mega nyemetak madah ke program baka nya ukai semina tuju nyua bantu aja, tang nyadi pelasar beguna bala tuai berandau terus enggau rayat sereta ninga empu sebana enggau peminta sida.-EDISI UKAS