KUCHING: Palan Sukung Sosial Lokal (PSSS) terus ngesan pengawa nyadi palan likun ungkup komuniti ngulihka servis sanding penemu enggau sukung chara profesional kelebih agi mutar isu pengerai runding ti majak narit perati.

Menteri Pemansang Indu, Ruang Bilik enggau Komuniti, Dato Sri Nancy Shukri madah, pengerai runding meseti diberi perati sebaka enggau pengerai fizikal laban tetiap individu tentu napi penanggul sereta pemar ba pengidup.

Ku iya, bisi kes penyalah berat ti dikelala bepun ari penanggul pengerai runding ti enda diputar nitih pematut.

“Lebuh penusah nyadi baka munuh diri sebilik tauka orang bukai, tebal agi kitai tetemu ke nya bepun ari penanggul pengerai runding.

“Nya kebuah, kitai meseti begulai ngesan tanggungpengawa nyaga pangan diri nyengkaum orang berimbai pendiau ngambi kitai nemu utai ti nyadi ngelingi endur kitai diau.

“Nya alai, kitai chakah ngatur aktiviti enggau program palan sukung sosial tu,” ku iya ba Program Mindness Tour: Kaunseling Kasih PSSS Yayasan Kebajikan Negara (YKN) di Balai Mayuhguna Kampung Selabat, Demak Laut kena Hari Enam.

Ba lansa sama, Kaban Parlimen Santubong nya mega madah, bisi 600 penerima zakat di tiga sitak Kunsil Nengeri (DUN) iya nya Tanjong Datu, Pantai Damai enggau Demak Laut udah dikelala nerima bantu.

Pia mega, bisi 1,033 bantu pemakai diberi Yayasan Kebajikan Negara, PEKEMA enggau PETRONAS dikena mantu raban ti begunaka bantu.

"Di Kampung Selabat enggau endur ngelingi nya, bisi 77 penerima asnaf ari 11 genturung pendiau nerima bantu pemakai ari Yayasan Kebajikan Negara kelai penyiru enggau sukung meruan.

“Bantu baka tu ukai semina nangkup peminta tang mega meri pengadang enggau pengering ngagai komuniti.

“Tu mandangka pengawa perintah begulai enggau bakih strategik semampai nentuka nadai siku kena tinggal kelimpah mantu genap komuniti,” ku iya.-EDISI UKAS

Pemberita : Ahmad Daniel Faiz
Gambar: Mohd Safizul Fa'izad Paisan