Perintah Sarawak Meri RM1.3 Juta Ungkup Palan Transit Orang Kampar
KUCHING: Perintah Sarawak ngagih belanja sepenyampau RM1.3 juta dikena ngenegap pengawa empat Palan Transit Orang Kampar (TTG) ba selampur nengeri, nyadi inisiatif mutar isu orang kampar nengah chara holistic.
Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah madah, agih belanja nya bekaul pengawa TTG ba Kuching enggau Sibu ti diatu udah berengkah ke pengawa, kelimpah dua agi palan baru ba Bintulu enggau Miri ti dipelaba berengkah ke pengawa taun tu.
Nitih ku iya, pengawa numbuh empat palan transit nya digaga pengudah meda penyampau orang kampar ba menua besai di Sarawak.
“Peminta belanja ti udah dipinta kitai ungkup empat palan TTG laban semua deka berengkah ke pengawa. Belanja diagih nitih guna siti kandang endur sereta penyampau orang kampar ke udah ditentu,” ku iya.
Iya madah munyi nya ngagai media pengudah meri pemeri ba Program Sejambak Kasih Aidilfitri Bagi Menua Kuching ditu, Hari Lima.
Ku iya nerang, agih belanja nya dikena nyendiaka perengka guna orang kampar ke diau dia nyengkaum alai tinduk, abis nadai nyendia pemakai tiap hari sereta mayar elaun penyaga sereta orang gawa ti ngatur pengawa palan transit nya.
“Kitai deka nentuka raban orang kampar tu enda tinduk ba kaki lima agi. Ba TTG, sida disedia alai transit ti likun belelak, makai sereta bulih bantu ti patut,” ku iya nerang.
Dato Sri Fatimah madah, pejalai pengawa TTG mujur lebuh penyampau orang kampar ba palan alai penerit atur meresa majak kurang.
Ba TTG Kuching, palan nya ulih alai nyentuk 100 iku lalu diatu berengkah ke pengawa ba premis lot kedai ti disuwa nangkan penanggul ngulihka palan ti engkeman agi, lalu alai lelaki enggau indu diau diserara dikena nentu pengelantang sereta pengelikun sida.- EDISI UKAS
