KANOWIT: Reti penyerakup enggau pemereti ati komuniti ti teguh nyadi kunchi nentuka Sarawak terus maju sereta dibasa ba renggat nasional tauka antarabansa.
Sapit Premier Sarawak, Datuk Amar Profesor Dr. Sim Kui Hian madah, Sarawak diatu benung mansang nipak agenda besai Sarawak nyadi nengeri maju manggai 2030.
“10 taun ti udah, lebuh kitai madah ke diri asal ari Sarawak, engka bisi ti ngemaruh ke kitai.
“Tang sehari tu, lebuh kitai nyebut nama Sarawak, mensia mayuh temegah meda kitai,” ku iya.
Iya madah munyi nya ba Pengerami Ngintu Taun Baru China 2026 ti diatur Komiti Pemansang enggau Pengelikun Genturung Pendiau (JKKK) Pengelantang Raban Bansa China N50 Machan enggau kerejasama Komuniti China Kanowit, kena Hari Enam.
Ku Datuk Amar Profesor Dr. Sim, ubah peragam nya asil ari pemanah iring tuai, pintar ngadu pekara wang sereta peneguh penyerakup rayat.
Taja Sarawak diaku berindik ari politik ti tegap enggau ekonomi ti entap, iya ngingatka mensia mayuh senentang pengawa negap infrastruktur baka rentayan jalai, hospital enggau sekula tetap dikemerat lalu meseti ditampung.
Berebak enggau nya, Menteri Pengerai Mensia Mayuh, Pengawa Berumah enggau Perintah Lokal nya minta komuniti China ba sitak Machan terus ngetan penyerakup enggau jauh timpai.
“Kitai diatu ba penuduk ti entap agi tang agi mayuh pekara ti meseti dikemansang.
“Pemansang meseti betampung lalu tu begunaka kitai maju begulai,” ku iya.
Ngenang sukut nyaga pengelantang, Datuk Amar Profesor Dr. Sim nyemetak madah ke pengeran perintah nengeri ba pelajar pechuma enggau nambah akses servis pengerai nyengkaum negap pengawa ngubat riman ba Sarawak.
Nangkan nya, Kaban Kunsil Nengeri (ADUN) Machan Allan Siden Gramong ba jaku pengelalu ngenang pemanah Datuk Amar Profesor Dr. Sim ti sanggup limpang begulai ngintu Taun Baru China begulai enggau komuniti di Machan, kelebih agi ungkup komuniti China ditu.
“Tu keterubah kenyau ari aku nyadi pengari rayat kitai ulih ngempuru komuniti China ari Machan ba balai tu. Aku pechaya ke urung 700 iku datai ditu,” terang iya.
Sama datai, ADUN Ngemah Anyi Jana, Temenggong Vincent Lau Lee Ming, Pemancha Leong Khing Hee, Pegawai Pelilih Kanowit, Cerisologo Sabut enggau Tuai Polis Kanowit Junical Ujal. - EDISI UKAS
