KUCHING: Pengeransing ngatur agenda bekaul ubah klimet ukai semina bepanggai ba pengingin enggau juluk ati aja tang patut digaga nengah pengawa ngenegapka institusyen ti entap, undang-undang ke engkeman sereta bisi pengulih diatur enggau efisyen antara perintah nengeri enggau Perintah Besai.
Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pengawa ngelanchar ripot Subnational Climate Change Institutional Assessment (CCIA) mai reti ke besai ba pengawa ngemanahka agi chara ngatur ubah klimet ba renggat subnasional.
Ku iya, ripot nya ukai semina nyidi penanggul ke bisi tang bela ngerintai pelin kuing tuju reformasyen ti berurun ke ngembuan langgur realistik lalu ulih digaga.
"Pengingin tauka juluk ati aja enda chukup. Pengawa kitai deka mujur enti institusyen ngembuan undang-undang ke nyemetak, ulih ngatur sektor, ngelanggur ungkus sereta matau pemujur pengawa," ku iya maya bejadika ripot nya ditu, Hari Dua.
Iya mega madah, nengah Konstitusyen Perintah Besai enggau Sempekat Malaysia 1963, Sarawak bisi kuasa signifikan ba pekara bekaul tanah, kampung, marin enggau pengeraja asal ti nyadi komponen beguna ba pengawa ngatur ubah klimet.
Ku iya, struktur enggau institusyen nya ukai nyadi penekul tang siti pengelebih strategik enti digaga enggau engkeman.
"Sarawak meruan chakah nempa bekerejasama enggau chara konstruktif begulai enggau Perintah Besai sereta Sabah dikena nentuka pengawa ngatur ubah klimet ulih digaga mujur ti mai pemaik ngagai menua," ku iya madah baru.
Bela datai Sapit Premier Sarawak Datuk Amar Douglas Uggah Embas enggau Datuk Amar Prof Dr Sim Kui Hian, Speaker Kunsil Nengeri Sarawak, Tan Sri Datuk Amar Mohamad Asfia Awang Nasar, Menteri ba Opis Premier Sarawak, Dato Sri John Sikie Tayai, Sekretari Perintah Sarawak, Datuk Amar Mohamad Abu Bakar Marzuki, Sapit Menteri Kuasa enggau Pemeruan Rampa Menua Sekitar Sarawak, Datuk Dr Hazland Abang Hipni enggau Tuai Raban Ekonomi Bank Dunya bagi Malaysia, Apurva Sanghi. -EDISI UKAS
