SARIKEI: Rayat Sarawak lebih agi peranak Sarawak ba menua Timur Tengah ditangkan ngambika semampai ngadang sereta nitih lalau pengelikun ari opis menua nya tauka Opis Duta Malaysia.

Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah madah, opis duta semampai berati pekara ke benung nyadi sereta ngemeratka pengelikun rayat Malaysia.

"Naka ke diatu opis duta semampai meri penerang dikena nentuka rayat Malaysia semampai likun kelimpah endur sida diau mega direjista ba opis duta.

"Tu ngambika opis duta nemu alai sida lalu nyema bisi penusah enda disadang nyadi, pengawa ke patut ulih lengkas diatur," ku iya madah ngagai media.

Iya bejaku munyi nya maya Pengerami Sejambak Kasih Aidilfitri 2026 ke diatur Opis Pengintu Pengelantang Mensia Mayuh (JKM) Sitak Sarikei ditu, Hari Dua.

Iya mega madah, macham bengkah chara diatur dikena mai rayat Malaysia ngagai endur ti likun agi kelimpah nentuka pengawa mai sida pulai ke menua ulih diatur enggau mujur.

"Kitai besampika semua rayat Malaysia ba menua ti benung charut semampai likun belama," ku iya.

Ba pengerami nya, bisi 420 iku nerima pemeri serimbai Aidilfitri ke deka datai.

Sama bisi datai iya nya Sapit Menteri Pengatur Mengeri, Tanah enggau Rampa Menua Sarawak Datuk Len Talif Salleh, Residen Sitak Sarikei Datu Michael Ronnie Langgong enggau Direktor JKM Nengeri Sarawak Semawi Mohamad. -EDISI UKAS