BAU: Serakup Nasional Nembiak Beserakup Sarawak (SABERKAS) Pampang Tasik Biru ngatur Program Nyadung Bubur Lambuk 2026 dikena ngaul komuniti sereta mereti ke Ramadan.
Program ti diatur di Masjid Darul Ikhsan, Kampung Buso sereta Surau Darul Muttaqin, Taman Mutiara nya udah dipenyadi Sapit Menteri Pengangkut Sarawak (Sungai enggau Tasik) ti mega Kaban Kunsil Nengeri (ADUN) Tasik Biru, Datuk Henry Harry Jinep.
Sama datai, Kapitan Kawasan Jambusan, Kapitan Ho Boon Fui sereta Chairman Masjid Darul Ikhsan, Ustaz Omar Mat.
Program nya diatur enggau kerejasama Masjid Darul Ikhsan Kampung Buso nyadi inisiatif ngerichah bulan Ramadan seraya ngerapit kaul entara komuniti.
Aktiviti program dipun pukul 8 pagi enggau pengawa begulai nyendia bubur lambuk sebedau disadung urung pukul 2 lemai ngagai peranak.
Kelimpah ba Kampung Buso, pengawa nyadung bubur lambuk mega diatur di Surau Darul Muttaqin, Taman Mutiara, Bau nentuka mayuh agi komuniti nerima pemeri nya.
Program nya ukai semina ngerichah Ramadan tang mega nyadi pelasar negap semangat begulai enggau beserakup entara komuniti. - EDISI UKAS
