SIBU: Inisiatif ngadu dokumentasyen sejarah sereta budaya ba Sarawak meseti chakah dipejalai nentuka nya terus dijaga enggau nyadi malin ngagai rebak dudi.

Sapit Menteri Besai, Datuk Amar Fadillah Yusof madah, agi tubah sejarah ti apin diadu dokumentasyen kelebih agi ba luar Semenanjung, lalu begunaka kerejasama semua dikena ngerikod peneleba enggau cherita lama.

“Agi tubah sejarah ti apin ulih diserungkai enggau apin mayuh sejarah ulih disimpan enggau diadu dokumentasyen.

“Tu mih ti diguna semua kitai, kelebih agi sida ti udah bisi peneleba ngambi begulai ngerikod sejarah ti dulu,” ku iya.

Iya madah munyi nya ba Pengawa Ngelanchar Bup “Secebis Kisah Perjuangan Bangsa: Ikhlasnya Pengorbanan Indahnya Kemerdekaan” di Hotel Tanahmas, Sibu kena Hari Enam.

Datuk Amar Fadillah ti mega Menteri Idar Kuasa enggau Transfomasyen Ai nyemetak madah ke dokumentasyen nya ukai semina ditatak ngagai sejarah bujang berani aja, tang mega meseti nyerangkung sukut budaya bansa sereta bemacham etnik ti nyadi pugu pengelantang komuniti ba nengeri tu.

Nya kebuah, iya meransang kerejasama ari Dewan Bahasa dan Pustaka (DBP), gerempung budaya, gerempung jaku sereta gerempung graduet di Sarawak ngambi bekerejasama enggau universiti ngambi bejalaika tungkap silik ba pengidup besehari-sehari.

Bela datai ba pengawa nya, bini Sapit Menteri Besai Datin Amar Ruziah Mohd Tahir, tokoh korporat Tan Sri Bustari Yusuf, Sapit Menteri Pelajar, Inovasyen enggau Pemansang Penau Sarawak, Datuk Dr Annuar Rapaee, Kaban Kunsil Nengeri (ADUN) Daro Dr Safiee Ahmad, Tuai Direktor DBP Hazami Jahari, Residen Bagi Menua Sibu Abang Mohamad Porkan Abang Budiman enggau bala bukai. - EDISI UKAS