KUCHING: Penyerakup terus mengkang nyadi pugu pemansang Sarawak sehari tu ti terus ngemeran bungkur rama nengah Strategi Pemansang Pengudah COVID-19 (PCDS) 2030.
Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, Perintah Sarawak udah ngagihka belanja urung RM685 juta nyadi inisiatif ngetan pengelantang komuniti mayuh pengarap di nengeri tu.
“Baka ditemu semua, naka diatu kitai udah ngagihka belanja urung RM685 juta, ke alai RM560 juta diagih ngagai beratus rumah sembiang ungkup pengarap bukai.
“Seraya urung RM120 juta diagih ungkup pemansang meruan sekula mission ba selampur Sarawak,” ku iya lebuh bejadi Kompleks Unit Pekara Pengarap Bukai (UNIFOR) di Jalai Ong Tiang Swee, ditu kena Hari Minggu.
Datuk Patinggi Abang Zohari mega madah, pengawa ngaga Kompleks UNIFOR tu mega mandangka pengeran Sarawak nyaga pengelantang entara mayuh pengarap enggau raban bansa di Tanah Kenyalang.
Pia mega, ku iya, UNIFOR nyadi pemun mayuh pengarap ungkup rayat bela bebasa pangan diri ti mai siti kerejasama ti nyelai di Malaysia.
Ku iya, penemu ti bebida enggau penanggul deka nyadi entara komuniti pupu bansa tang chara mutar meseti digiga.
“Pengawa mutar nya meri pemaik ngagai semua. Nasip endar, Sarawak nyadi pun penyerakup ngambi mai Malaysia majak mansang,” ku iya.
Bela datai, dua Sapit Premier Sarawak Datuk Amar Douglas Uggah Embas enggau Datuk Amar Prof Dr Sim Kui Hian, Menteri Nembiak, Lumba enggau Pemansang Orang Dagang Sarawak Dato Sri Abdul Karim Rahman Hamzah, Menteri Pelajar, Inovasyen enggau Pemansang Penau Sarawak Dato Sri Roland Sagah Wee Inn, Menteri ba Opis Premier Sarawak Dato Sri John Sikie Tayai, bala Sapit Menteri Sarawak, Direktor UNIFOR Dato Georgina Apphia Ngau, tuai pengarap, tuai opis sereta temuai dipebasa bukai. -EDISI UKAS
Pemberita : Ahmad Daniel Faiz
Gambar: Ibanez Jeffery
