KUCHING: Kompleks Unit Pekara Pengarap Bukai (UNIFOR) nyadi lambang penyerakup, pengelikun enggau pengelantang di Sarawak ti bepuguka pupu bansa di nengeri tu.

Sapit Premier Sarawak Datuk Amar Douglas Uggah Embas madah, langkar tengkebang Kompleks UNIFOR ti moden ngena konsep 'One Wrap’sereta tusun atur ti lantang mandang penyerakup pupu bansa Sarawak enggau pengarap nengah motif bintang betandu nyadi lambang pengelain.

"Kompleks UNIFOR deka nyadi pelasar dinamik ke alai mayuh rumah sembiang ulih begempuru, berandau sereta nempa randau dikena negap pemereti enggau ngerapit kaul entara komuniti pupu bansa,” ku iya.

Iya madah munyi nya ba Pengawa Bejadi Kompleks UNIFOR ti dipenyadi Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg di Jalan Ong Tiang Swee, ditu kena Hari Minggu.

Ngenang pasal kompleks nya, Datuk Amar Douglas Uggah madah, kompleks 10 ringkat beungkus RM75.663 juta nya dikemansang nengah standard Green Building Index (GBI) nipak agenda pemeruan rampa menua Sarawak.

Ku iya, kompleks nya ngundan menara opis semilan ringat, ruang eksekutif, taman beperabung, dewan bankuet kapasiti 1,000 iku, semilan unit palan dagang sereta 286 entepan entukar nyengkaum fasiliti ngechaj entukar elekterik (EV).

Ku iya agi, fasiliti ba ringkat 9 nyengkaum ari 2 bilik sereta taman beperabung ba ringkat 10 disedia pechuma ngagai mayuh rumah sembiang.

Nambah ke nya, Menteri Beempu Tanggungpengawa Ngagai UNIFOR nya ngelalau rayat Sarawak terus ngetan rega begulai iya nya pengelikun nipak inisiatif nyingkang ke mua ba dunya ti majak kompleks tu.

“Penyerakup ukai datai tekala nya tang begunaka pengawa betandu, lurus ati sereta bela bebasa ke bida sambil nerima pangan diri nadai ngira raban bansa enggau pengarap,” ku iya. - EDISI UKAS

Pemberita : Ahmad Daniel Faiz
Gambar: Ibanez Jeffery