BETONG: Malam Panggau Budaya serimbai Regata Betong 2026 nyadi penyungkak pematak dagang temuai pengudah mujur ngempuru beratus pengusung sereta mandang pesaka budaya menua ba siti pelasar besai.

Program ti diatur di Astaka Utama Regata, Waterfront Betong nya mandangka mayuh program seni nyengkaum pekit Regata Idol, Puteri Cilik Warisan enggau Battle of the Band ti narit perati bala pengusung.

Sapit Menteri Nembiak, Lumba enggau Pemansang Orang Dagang Sarawak ti mega Kaban Kunsil (ADUN) Layar, Datuk Gerald Rentap Jabu datai ngundang komuniti sereta bejadi pengawa nyua perais ngagai bala pemenang.

Bela datai, Kaban Parlimen Betong, Dato Dr Richard Rapu kelai sukung ngatur program ti meri empas ngagai komuniti.

Pekit Puteri Cilik Warisan ti ngaul 10 finalis nyadi pelasar beguna narak pengawa nyaga budaya sereta nempa pemerani nembiak mit mandangka pekayan asal pupu bansa.

Nangkan nya, pekit Battle of the Band besuluka jaku Dangdut Rock ngemata tujuh tim bepekit ke alai Silent Killer dari Kuching nyadi champion lalu mai pulai perais mata duit RM2,000.

Penuduk kedua dipenggi tim Double SE ari Kampung Bungin, Spaoh enggau perais RM1,000, lalu penuduk ketiga diempu tim Mixed Generation ari Saratok ti nerima RM800.

Pengerichah pengawa ti matak urung 500 pengusung nya mega richah enggau pemerindang seraya ngujungka nya entara pengawa besai Regata Betong taun tu.

Program bepelasarka budaya tu ukai semina ngidupka regata, tang mega negap identiti komuniti, ngeranchak dagang temuai sereta nyendia pelasar pemansang penau lokal. - EDISI UKAS