KUCHING: Jalai Ong Tiang Swee deka ditangkir dikena nambahka pemesai jalai nya ti mega entara jalai pemadu beguna nengah pemisi kompleks enggau begunan ti ngundan mayuh organisasyen.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg setuju ke peminta Sapit Premier Sarawak Datuk Amar Douglas Uggah Embas ba jaku pengelalu berindik ari jalai nya majak sempit enggau pemansang ti deras sepanjai jalai nya.
“Suba, jalai tu dkira besai lalu entara jalai ti suah ditengah tang diatu jalai nya majak sempit.
“Nya kebuah, Datuk Amar Douglas minta jalai tu ditangkir tang iya Menteri Infrastruktur enggau Pemansang Penyangkai Kapal Sarawak, endang bepanggai ba iya.
“Nya mih aku alit ati lebuh aku ninga nya tang engka iya deka agih belanja, nya kebuah Datuk Amar Douglas bepanggai ngagai nuan ngereja nya, ila kitai ngiga duit ungkup nuan,” ku iya.
Iya madah munyi nya ba Pengawa Bejadi Kompleks Unit Pekara Pengarap Bukai (UNIFOR) di Jalan Ong Tiang Swee, ditu kena Hari Minggu.
Nambah ke nya, Premier Sarawak mega ngemendar entepan entukar beringkat ungkup Begunan UNIFOR ti mega dipinta Datuk Amar Douglas Uggah dikena mutar isu entepan entukar ba jalai nya.
Iya mega nundi Datuk Amar Douglas anang minta entepan entukar kelalu moden ti ngena sistem automatik.
“Diatu, mayuh agi entepan entukar ngena lif ke alai pengudah niki ngena lif, entukar nya deka ngiga entepan kediri empu.
“Tu mega automatik nadai deriba lalu sistem automasyen deka ngiga entepan kediri.
“Tang, anang minta endur baka nya laban nadai duit ngaga entpena entukar baka nya tang enti ngaga entepan entukar baka selama, ulih mih,” ku iya.
Ba pengawa nya, Premier Sarawak mega ngemendar agih belanja RM1 juta ari Petroleum Sarawak Berhad (PETROS) ngagai Kaunsil Amanah Ngintu Pengelantang UNIFOR.
Iya mega ngemata pengawa nyua setipikit Green Building Index (GBI) ungkup Kompleks UNIFOR ti digaga ngena lampu asal, kereban elekterik ngelimat kuasa sereta ke bukai.
Bela datai, dua Sapit Premier Sarawak Datuk Amar Douglas Uggah Embas enggau Datuk Amar Prof Dr Sim Kui Hian, Menteri Nembiak, Lumba enggau Pemansang Orang Dagang Sarawak Dato Sri Abdul Karim Rahman Hamzah, Menteri Pelajar, Inovasyen enggau Pemansang Penau Sarawak Dato Sri Roland Sagah Wee Inn, Menteri ba Opis Premier Sarawak Dato Sri John Sikie Tayai, bala Sapit Menteri Sarawak, Direktor UNIFOR Dato Georgina Apphia Ngau, tuai pengarap, tuai opis sereta temuai dipebasa bukai. -EDISI UKAS
Pemberita : Ahmad Daniel Faiz
Gambar: Ibanez Jeffery
