IGAN: Jematan Batang Igan ti udah lama dianti peranak ditaga ulih ditengah mensia mayuh kena 16 Mac tu, lalu nyadi penyungkak pemansang enggau nambah rentayan penyambung ba kandang tebing tasik Sarawak.

Pekara nya dibantai ba aum penyeraris ungkup pengawa bejadi tumu (soft opening) projek nya diatur di Opis Taba Jematan Igan, kena Hari Dua.

Aum betuai ke Direktor Projek ti mega Injinia Bagi Menua Opis Kereja Raya (JKR) Bagi Menua Mukah, Awang Dasuki Awang Dol.

Pengawa bejadi tumu jematan nya disadang dipenyadika Sapit Premier Sarawak ti mega Menteri Infrastruktur enggau Pemansang Penyangkai Kapal Sarawak, Datuk Amar Douglas Uggah Embas.

Jematan ulih ditengah dikeandal meri empas besai ngagai peranak menua laban ngemandak jam pejalai entara Matu, Daro enggau Mukah, kelimpah ngemuntang pejalai ngelawa menua bukai di utara Sarawak.

Senutuk pengawa bejadi jematan nya, servis feri Igan ti sebedau tu nyadi penyambung menua nya disadang diketu ba hari sama pengudah pengawa bejadi tumu nya.

Projek ngaga Jematan Batang Igan diperati siti pemujur besai ba pengawa negap infrastruktur pengangkut nengeri, sereta ngerandang mayuh agi peluang pemansang ekonomi ngagai komuniti menua nya.

Sama datai ba aum nya Pegawai Pelilih Matu, Hamidah Halpi.- EDISI UKAS