KUCHING: Ujan bangat enda ngetu kenyau ari tumu pagi Hari Dua ngujungka sekeda genturung pendiau di Bagi Menua Kuching ampuh bah lalu dua Palan Pengenduh (PPS) dibuka ungkup endur orang tasah bah ngenduh.

Komiti Penyangga Penusah Nengeri Sarawak (JPBNS) ba siti penerang madah, PPS Dewan R-Piang udah dibuka sehari tu ti endur 38 orang tasah ari tujuh Tuai Ruang Bilik (KIR) diau ngenduh.

Seraya PPS Dewan Stapok mega dibuka ba hari sama dikena besikap endur orang tasah bah diau, tang penyampau KIR enggau sida ti tasah dipindah kia agi benung ditiap raban bekuasa.

Naka diatu, dua PPS dibuka di Bagi Menua Kuching enggau penyampau semua tujuh KIR ngaul 38 orang tasah, seraya gaya mindah orang tasah diripot nambah berindik ari ujan bangat agi nyadi ngujungka tikas ai ba sekeda genturung pendiau jampat niki.

Raban bekuasa terus matau gaya penusah enggau ngelalau peranak ba endur baruh sereta jampat ampuh ngambi seruran bejaga sereta nitih gerah pindah enti ditesau.-EDISI UKAS

Gambar kredit: Raban Penyaga Orang Periman Malaysia (APM) Sarawak