SRI AMAN: Raban pemekuh media enggau tuai komuniti beguna endar nentuka berita pejalai projek pemansang di Bagi Menua Sri Aman dikenatai enggau betul sereta meri pemaik ngagai rayat menua.

Chairperson Agensi Pemansang Sri Aman (SADA) ti mega Penyanding Penemu Premier Sarawak (Matau Projek enggau Program Menua Pesisir), Dato Sri Rohani Abdul Karim madah, kerejasama semua raban nyengkaum agensi bejalaika projek, bakih media enggau bala tuai komuniti endang beguna dikena ngemujur bemacham inisiatif pemansang di sitak nya.

Ku iya, media ngesan pangku pengawa besai ngenataika penerang bekaul program enggau projek pemansang ngagai rayat ngambi tetiap pengawa dikereja perintah ngambi rayat ulih nemu reti enggau nyata agi.

“Sukung bakih media endang dikenang laban sida mantu ngenataika penerang pasal bemacham inisiatif enggau program pemansang ngagai rayat,” ku iya.

Iya nyebut jaku nya ba Pengerami Buka Puasa diatur SADA ditu kena Hari Dua ti mega digulu Residen Bagi Menua Sri Aman, Mahra Salleh.

Kelimpah ari nya, iya mega meri terima kasih ngagai bala tuai komuniti ti seruran meri kerejasama ngagai raban SADA, kelebih agi nyaup ngemujurka sesyen gawa begulai enggau komuniti.

Iya madah, kerejasama rat entara semua raban beguna endar nentuka projek pemansang ti dilanggur ulih dipejalai lanchar sereta tembu nitih taga.

“Lebuh projek tembu ila, tu deka meri pemaik besai ngagai komuniti di Bagi Menua Sri Aman, kelebih agi nambah perengkaguna, pengelantang enggau peluang pemansang ekonomi di sitak tu,” terang iya.

Berebak enggau nya, iya ngarap ke kerejasama entara SADA, agensi teknikal, raban media sereta bakih strategik deka terus ditanggam rat nentuka semua pengawa pemansang di Bagi Menua Sri Aman ulih digaga mujur.

Pengerami buka puasa nya mega nyadi pelasar negut kaul entara bakih media, tuai komuniti sereta agensi bejalaika projek ti ngaul diri ba pemansang di Bagi Menua Sri Aman.-EDISI UKAS