MARUDI: Sapit Menteri ba Opis Premier Sarawak (Pengereja Kasar, Imigresyen enggau Patau Projek) Datuk Gerawat Gala udah ngabas projek jalai Kampung Hizrah, Benawa ditu kena Hari Enam.

Ku iya, pejalai ngabas nya dikena berati kediri pejalai sereta kualiti projek nya nentuka lanchar enggau meri pemaik ngagai peranak lokal.

“Pengawa matau belebuh beguna amat nentuka projek pemansang ti dipejalai perintah amat nitih ke standard ti ditetapka kelimpah tembu nitih taga,” ku iya.

Ku iya, Perintah Sarawak naka ulih nambah infrastruktur ba kandang menua pesisir kelebih agi dikena ngemuntang pejalai peranak sereta nyaga pengelantang rayat.

Datuk Gerawat mega madah, pengawa nyeruri jalai nya benung dilanggur enggau deka dipejalai berenggat.

Ku iya agi, pengawa nyukat jalai nya deka diadu Opis Tanah enggau Survei dulu nentuka nadai penanggul nyadi enggau pengempu Tanah Adat Bansa Asal (NCR) tauka pekara bukai.

“Aku minta pekara tu nadai mayuh leman sereta peminta ngelui ari pematut ti ulih ngasuh pejalai projek nya laun tauka tekinsil,” ku iya.

Pejalai ngabas nya mega disempulang 47 penyereta ari peranak genturung pendiau, staf perintah sereta kaban Komiti Pemansang enggau Pengelikun Genturung Pendiau (JKKK) Kampung Hizrah enggau Kampung Kuala Tutoh. - EDISI UKAS