SIBU: Rentayan nyaga pengerai PMG Healthcare ti bepalan ba Sarawak bisi pengulih angkat nyadi rentayan perubat begulai pemadu besai ba Malaysia taja bepun ari Borneo.

Sapit Premier Sarawak Datuk Amar Profesor Dr. Sim Kui Hian madah, pejalai PMG bukti inisiatif ti bepun ba Sarawak ulih mansang nyadi rentayan nyaga pengerai ti tegap nengah komitmen sereta inisiatif begulai sida ti milih nempa pemansang ba nengeri tu.

Ku iya, lebih 10 taun ti udah nurung taun 2012, PMG ngepun operasyen enggau numbuh farmasi sebedau ngerembai servis ngagai klinik perubat ba Sri Aman sereta klinik ngeli ba taun 2013.

“Sehari tu, PMG bisi lebih 200 farmasi, 40 klinik ba Sarawak, lapan klinik ngeli enggau diatu dua palan fisioterapi. Tu pemujur tu ngemegah ati.

“Aku nganti pemansang bukai ukai semina ungkup nyadi rentayan pemadu besai tang mega rentayan perubat begulai pemadu besai ba Malaysia ti belabuh ari kampung Borneo,” ku iya.

Iya madah munyi nya maya bejadi PMG Physio di Jalai Pahlawan, ditu kena Hari Enam.

Datuk Amar Profesor Dr. Sim ti mega Menteri Pengerai Mensia Mayuh, Pengawa Berumah enggau Perintah Lokal mega muji pemerani PMG nyerungkai teknologi baru nyengkaum ngena sistem penyuman robotik ba perubat fisioterapi dikena nambah kualiti idup pesakit.

Iya ngarap mayuh agi inisiatif inovatif baka nya deka terus nyungkak pemansang sektor nyaga pengerai ba Sarawak nipak juluk pemansang nengeri manggai 2030.

Kelimpah ari nya, iya mega nyemetak madah ke bidang fisioterapi agi bisi pengulih besai dikemansang ba Sarawak berindik ari bidang nya apin diserungkai.

Ku iya, penyampau fisioterapis di Sarawak agi bisi tatak enggau hospital perintah semina bisi urung 24 pangku pengawa fisioterapi lalu ukai semina nya diisi, seraya nunjukka ruang ti besai ngerembai bidang nya dudi hari.

Sama datai, Direktor Atur Pengawa PMG Healthcare Sdn Bhd Dr Chieng King Chong, Sapit Direktor Atur Pengawa PMG Healthcare Sdn Bhd Andrew Wong Pak Ung, Tuai Kaban Farmasi PMG Healthcare Sdn Bhd Ling Hung Leong sereta Direktor Fisioterapi PMG Physio Sdn Bhd Everlynn Hii Yi Xuan. - EDISI UKAS