LAWAS: Teknologi ti deras mansang begunaka rayat terus belajar enggau nambah penemu ngambi enda tinggal lalu semina ngemata aja sereta bepanggai ba orang bukai.

Sapit Premier Sarawak Datuk Amar Awang Tengah Ali Hasan madah, rayat patut seruran ransing nambah penemu ngambi ulih ngati kediri enggau seruran ulih besemekih.

“Ari pemeras, pemagas enggau pengeransing belajar, kitai ulih besemekih enggau ngati kediri.

“Anang jampat mantul ati ngiga pemujur,” ku iya ba mua mayuh rambau Program Iftar Perdana Pelilih Lawas di Masjid Datuk Pengiran Haji Matusin, Kampung Dato Kuala Lawas, kena Hari Enam.

Kaban Kunsil Nengeri (ADUN) Bukit Sari nya madah baru, raban orang Islam di Sarawak mega patut meri perati ngagai penemu kelebih agi penemu pengarap ngambi semak agi enggau Allah SWT sereta bejalaika tanggungpengawa baka fardu ain ti menyana.

Iya mega madah, pengawa ngelati pelajar pengarap mega deka majak diberi perati nyengkaum perambu pemansang kelas agama dikena narak pemereti ati Islam ba rayat.

Ba program nya, iya mega bisi nyua pemeri ngagai penerima ngaul bantu ari JAKIM enggau sitak N82 Bukit Sari.

Sepenyampau 50 penerima nerima pemeri pemakai enggau mata duit dikena mantu raban ti begunaka bantu ngintu Aidilfitri.

Kelimpah ari nya, 10 iti al-Quran mega bisi diberi ngagai sekeda genturung pendiau di Merapok enggau Kuala Lawas dikena nyukung pengawa narak pemereti ati enggau belajar ke al-Quran ba rayat menua nya. -EDISI UKAS