KUCHING: Tuchum gaga bala anak patut balu sereta raban seranta nyengala dipeda lebuh sida bisi peluang milih kediri gari ray aba program meli begulai enggau Sapit Menteri Besai, Datuk Amar Fadillah Yusof di Aeon Mall ditu, Hari Minggu.

Sepenyampau 150 nembiak mit ari sitak Kunsil Nengeri (DUN) Samariang dibai meli gari serimbai ngintu Aidilfitri tu.

Datuk Amar Fadillah enggau bini, Datin Amar Ruziah Mohd Tahir empu bisi datai milih baju Melayu ngagai sekeda nembiak mit, lalu nya meri pengaga sereta ngasuh sida ngasai kediri dikeibuh.

Bala anak ti ngulu program nya datai ari 22 ranting Parti Pesaka Bumiputera Bersatu (PBB) ba sitak Samariang enggau tetiap ranting nganjung entara lima ngagai tujuh penyereta.

Sama datai, Sapit Menteri ba Opis Premier Sarawak (Undang-Undang, MA63 enggau Kaul Nengeri-Perintah Besai) ti mega Kaban Kunsil Nengeri (ADUN) Samariang, Datuk Sharifah Hasidah Sayeed Aman Ghazali.

Lebuh dirandau media, iya madah ke tetiap penyereta nerima pemeri RM200 dikena meli utai diguna maya Hari Raya Aidilfitri.

“Tu nunjukka raban Nembiak PBB enggau parti PBB ba renggat pampang seruran betati ke pengelantang rayat, kelebih agi nembiak mit ngambi sida mega berasai gaga ngintu Aidilfitri,” ku iya.

Iya mega madah, program nya udah diatur kenyau ari 21 taun ke udah lalu ditandu belama nyadi pengawa ngintu pengelantang bala anak patu balu enggau ruang bilik seranta ba sitak nya.

Sekumbang program nya, Datuk Amar Fadillah mega bisi limpang nyapa sereta ngerandau bala pengusung bukai ba palan besai bebelika barang nya, ti enda masau peluang berandau enggau iya.-EDISI UKAS

Pemberita: Ahmad Daniel Faiz
Gambar: Ibanez Jeffery & George Embie