KUCHING: Sepenyampau 58 peranak ari Kampung Stutong Baru Melayu enggau Kampung Batu Perak nerima pemeri bantu pemakai ba Program Pemeri Bantu Pemakai Sejambak Kasih sereta Majlis Iftar 2026 diatur di Farley Mall, ditu, Hari Minggu.

Program diatur Palan Servis ADUN Kota Sentosa enggau kerejasama Farley Mall Kuching nya dipenyadi Kaban Kunsil Nengeri (ADUN) Kota Sentosa, Wilfred Yap Yau Sin kelai betatika pengelantang raban ti begunaka bantu serimbai bulan Ramadan.

Pemeri ti disua nya ngundan ai manis tin sereta sekeda barang pemakai pemun dikena nyaup ngelempung belanja penerima nyendiaka diri sekumbang Ramadan.

Ku Wilfred Yap, bulan Ramadan nya awak ngingatka komuniti senentang pengasih, penyiru enggau bekunsi jereki ngagai raban ti begunaka bantu.

Ku iya, inisiatif nengah program Sejambak Kasih nya inisiatif Palan Servis ADUN Kota Sentosa mantu ruang bilik ti begunaka bantu ngambi sida ulih ngintu Ramadan enggau ati lantang begulai enggau diri sebilik.

“Taja pemeri tu enda entu berega, tang diberi enggau ati lurus kelai siru ke komuniti menua tu,” ku iya.

Iya mega madah, nyadi pengari rayat, iya deka ransing agi ngundang rayat enggau nentuka pengelantang sida seruran dijaga nadai ngira raban bansa tauka tirai juru.

Program nya mega ngayanka kerejasama rat entara bala tuai enggau voluntia lokal ngemujurka inisiatif ngintu pengelantang komuniti menua. - EDISI UKAS

Pemberita: Lonney Jinab