KUCHING: Perintah Sarawak ngemendarka siling agih belanja ba Langgur Pemansang Malaysia Lumpar Ke-13 (RMK-13) sepenyampau RM57.327 juta nentuka pemansang ti berurun agi ba selampur nengeri.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, nya nyengkaum bejalaika projek Perambu Pemansang Perengkaguna Mensia Mayuh di Kompleks Administrasyen Begulai Mulu, Pelilih Marudi.

Ku iya, pemansang nya chukup beguna endar dikena negapka servis perintah ba kandang menua ulu kelimpah nyukung ekonomi menua tumbuh kelebih agi di Mulu enggau kandang ngelingi.

“Seriris enggau nya, perintah mega bejalaika projek ngaga jalai baru ngaul rentayan jalai Miri–Marudi, Marudi–Mulu (Kuala Melinau) sereta Long Lama–Long Panai urung 142 kilometer pemanjai dikena nyambung ‘missing link’ ba menua nya," terang iya ba Pesan Khas serimbai Hari Raya Aidilfitri 2026.

Iya madah baru, projek nya disadang nambah rentayan jalai penyambung enggau aksesibiliti, lalu ngeranchakka pemansang sosioekonomi ba menua ulu Baram enggau Marudi.

Iya nerang, nya disadang meri pemaik ngagai urung 75,000 peranak ba sitak Kunsil Nengeri (DUN) Marudi, Telang Usan enggau Mulu, kelebih agi nambah pengelikun pejalai enggau akses ti muntang agi ngagai servis diguna baka pengerai enggau pelajar.

“Projekt u mega nyeruri akses ke Taman Negara Gunung Mulu, Taba Pesaka Dunya UNESCO, lalu nyukung sektor dagang temuai tumbuh sereta negap integrasyen kandang menua nengah sambung Sabah–Sarawak Link Road," terang iya. -EDISI UKAS