KUCHING: Pengerami ngintu Hari Raya Aidilfitri ukai semina hari besai pengarap tauka begelumu diri sebilik aja, tang nyadi pelasar besai negutka penyerakup enggau semangat segulai sejalai ba rayat pupu bansa di nengeri tu.
Sapit Premier Sarawak, Datuk Amar Prof Dr Sim Kui Hian nyametak madah, pengerami nerima pengabang ti diatur maya Aidilfitri ngayanka pengelantang lebuh rayat nadai ngira tirai juru begelumu, berandau enggau sama bekunsi jereki.
Ku iya, hari besai tu mega mandangka penyelai rayat ti idup bebaik, bebasa enggau nyagu pengelain budaya, lalu nyadi pugu nempa nengeri ti entap enggau tegap.
“Hari Raya tu awak pemadu manah kitai pulai makai serumpu, begulai enggau diri sebilik sereta ngerapitka kaul ti engka udah lama enda betemu ketegal kiruh gawa,” ku iya ba Pesan Hari Raya Aidilfitri 2026.
Iya mega madah, penyiru enggau pengasih ti tebantai sekumbang musin pengerami lambang pemanah rayat ti seruran betati ke nasip pangan diri.
“Ukai semina ari pemeri belanja aja, tang deka ibuh enggau bebasa ke pangan diri ngasuh nengeri tu majak dibasa enggau dikenang,” ku iya.-EDISI UKAS
