PAKAN: Perintah Sarawak majak ransing negap pemansang menua pesisir nengah projek Program Transformasyen Menua Pesisir (RTP) ti meri empas besai ngagai pengelantang rayat.
Senutuk enggau pengawa nya, Penyanding Penemu ba Opis Premier Sarawak (Industri Pemakai, Komoditi enggau Pemansang Kandang Menua) ti mega Kaban Kunsil Nengeri (ADUN) Pakan, Tan Sri William Mawan Ikom udah bejadi projek taba rumah panjai baru di Rumah Melaka, Sungai Mun, Seberai Nunggang ditu, Hari Empat.
Projek beungkus RM100,000 nya disadang tembu dua bulan lalu nyadi pun pengawa ngentak rumah panjai ti lantang enggau likun agi ngagai peranak.
Ku iya, inisiatif nya ukai semina nyendiaka perengkaguna pemun ti meruan agi, tang mega ngurangka penusah angus nyadi dibanding rumah lama.
