KUCHING: Kongres Tenpin Boling Malaysia (MTBC) mujur ngatur Kus Jurulatih Tikas 1 MTBC ti ngempuru bala penyereta ari mayuh renggat komuniti boling berengkah 9 ngagai 12 Mac 2026 di Megalanes Sarawak, ditu.
Kus nya udah digulu jurulatih pemansang enggau kaban komiti Serakup Tenpin Boling Amatur Sarawak (ABAS) begulai enggau atlit sereta pegawai Para Sarawak nyengkaum sekeda atlit para nasional.
Kus nya diembing Sekretari Besai MTBC, Maradona Chok, ti bekunsi penemu iya sekumbang kus pengelama empat hari nya.
Nambah ke nya, kus nya nyadi pelasar beguna bekunsi penemu enggau pemansang kapasiti bala penyereta.
Bala penyereta diiri penemu prinsip pemun jurulatih, langkar kereja pemansang atlit sereta chara latih berurun ti beguna endar dikena nempa pemain boling ba renggat baruh enggau kompetitif.
Ngena sesyen teori b akelas enggau latih praktikal di kelang boling dipegulai, penyereta bulih penemu berega pasal teknik jurulatih, matau atlit enggau komunikasyen nemban entara jurulatih enggau atlit.
Ari perspektif ABAS, kus nya siti ari pengawa ti besai reti dikena negap pun pemansang main boling di nengeri tu.
Ari nyikap jurulatih pemansang enggau pegawai ngena penemu nyadi jurulatih ti betauliah, ABAS ngarap ulih nambahka program renggat baruh sereta nyukung langkar timpuh panjai main nya di Sarawak tumbuh.
ABAS mega terus ransing ngerandang jalai ti entap agi ngagai pemain boling ti bisi juluk besai sereta narak kerejasama ba komuniti boling. - EDISI UKAS
