SIMANGGANG: Pengerami Hari Polis Ke-219 Taun 2026 Renggat Indu Opis Polis Pelilih (IPD) Sri Aman nurai sejarah lebuh enam pengari rayat datai, lalu nya ngayanka sukung tegut bala tuai ngagai raban nyaga pengelikun menua.
‘
Sida enam nya nyengkaum Sapit Menteri Pelajar, Inovasyen enggau Pemansang Penau Sarawak, Datuk Francis Harden Hollis sereta Sapit Menteri Dagang Temuai, Industri Kreatif enggau Seni Pemerindang Sarawak, Datuk Snowdan Lawan.

Pia mega Kaban Parlimen Batang Lupar, Mohamad Shafizan Kepli, Kaban Kunsil Nengeri (ADUN) Bukit Begunan, Datuk Mong Dagang, ADUN Lingga, Dayang Noorazah Awang Sohor sereta ADUN Engkilili, Dr Johnnical Rayong Ngipa.

Semua pengari rayat nya datai ba padang kawad IPD Sri Aman urung pukul 3.45 ngalihari dientudi penatai Tuai Polis Pelilih Sri Aman, Superintenden Dennis Bunyam pukul 4 lemai ungkup ngepun pengawa.

Gempuru dipun enggau lagu Negaraku, Ibu Pertiwiku enggau Sang Saka, dientudi Lafaz Ikrar Taat Setia sebedau Dennis nyebut jaku pesan Tuai Polis Menua, Inspektor Jeneral Dato’ Sri Mohd Khalid Ismail.

Pengerami ditampung enggau pengawa meri pangkat ngagai Sarjan Mejar Thomas Law, Sarjan Rhodney Ro Dri Gues Usop enggau Sarjan Stanley Changgan Eddy.

Kelimpah ari nya, Setipikit Ngenang Jasa mega bisi disua ngagai Inspektor Muhamad Nazim Mohd Jafri, Sub Inspektor Ariffin Sabang, Sarjan Mejar Abang Ridzuan Abang Haid, Sarjan Richmond Jins Sempurai, Sarjan Nicholas Lee Lipi, Sarjan Fernando Libai, Sarjan Peter Rajesh Wilson Lingkong, Sarjan Mclister Alexis Sellie enggau Sarjan Mohamad Alias Mohdar.

Pengerami ti mega digulu Sapit Tuai Polis Pelilih Daerah Sri Aman, DSP Neil Beginda nya tembu enggau pengawa begambar bebala mayuh begulai enggau pengari rayat sereta raban IPD Sri Aman.

Seraya lebuh dirandau pemberita, Dennis madah ke bisi 103 ditangkap ngaul kes dadah dirikod di Pelilih Sri Aman ari Januari nyentuk Mac taun tu.

Ari penyampau nya, 16 kes ngembuan dadah seraya 87 kes da salah guna dadah nengah Seksyen 15(1)(a) Akta Dadah Berbahaya 1952.

Iya mega madah, raban polis meri perati ngagai bala ti gian dadah baru, ke alai sebagi ari kes dipansik nengah Seksyen 39C akta sama.

“Pesalah ti dituku salah makai dadah baru ngelui ari dua kali tau diukum jil abis nadai lima taun enggau abis lama tujun taun sereta enda ngelui tiga kali,” terang iya.

Iya madah baru, IPD Sri Aman terus chakah neritka atur nengah Ops Tapis Khas ngena jaku peransang ‘Tiada Hari Tanpa Tangkapan Kes Dadah’.

“Taja kes bisi nambah mimit dibanding taun nyin tadi, ngembuan enggau salah guna dadah di Sri Aman agi ulih dijaga asil pengawa neritka atur dipejalai belama,” ku iya.-EDISI UKAS