Petrus Shitembi Nyadi ‘Hero’, KCFC Nurai Sejarah Tikit Final Trofi Malaysia
KUCHING:Tim Kuching City FC (KCFC) nurai sejarah kediri lebuh mujur nyingkang ke final Trofi Malaysia keterubah pengudah ngalahka Selangor FC 1-0 ba pekit renggat semifinal kedua di Stadium Negeri, Petra Jaya kena Hari Enam.
KCFC nyingkang enggau agregat 2-1 pengudah pemutus kededua tim 1-1 ba semifinal keterubah sebedau tu.
Pekit ranchak kenyau ari wisel disepu enggau kededua tim sama ngansak.
Peluang KCFC nyau deka datai ba minit ke-11 lebuh tanduk Gabriel Nistelrooy nyau deka tama gol tang tepawah.
KCFC mega nyau deka bulih gol ba minit ke-20 nengah pemain sayap, Joao Pedro, tang semina nuju tiang sebedau dikinsil ketegal ofsaid.
Penyaga gol KCFC, Haziq Nadzli mega nyulut lebuh nyadi hero nyekat Faisal Halim ari masukka gol tang ofsaid.
Stadium Nengeri berauh ari panjung 20,000 penyukung lebuh Petrus Shitembi nyipak bol lalu tama ba minit ke-30 ari luar kutak penalti ti mai KCFC ba mua.
Gol nya ngasuh KCFC bemain enggau andal agi sereta ngansak kubu tim sepiak tang puntan bulih sebarang gol nyentuk main renggat keterubah abis.
Renggat kedua meda main majak ngasuh ati gidan lebuh Selangor FC lenyau pemain ba minit ke-50 lebuh Safuwan Baharudin diberi kad mirah pengudah main kasar enggau Ronald Ngah Wanja maya ‘last man defender'.
Nya dikena manah KCFC terus ngansak ke alai Ronald Ngah mujur nanduk bol ari Jimmy Raymond ba minit ke-60 tang dikinsil ketegal ofsaid.
Tim dilaban majak tusah lebuh Mukhairi Ajmal l diberi kad mirah ba minit ke-62 ketegal kelalu kasar enggau Jimmy Raymond ngujungka sida semina bemain semilan pemain aja.
Panjung bala penyukung nyau deka berauh ba Stadium Negeri sekali da lebuh Ramadan nendang bol ba minit ke-68 tang kena tiang gol.
Taja bisi pengelebih dua pemain, KCFC puntan nambah gol tang terus nguasa main.
Datai ba 10 minit kepenudi, Selangor FC ti nguji angkat enggau ngatur main, tang terabai KCFC tetap tegap nyentuk wisel kepenudi.
KCFC deka ngelaban Johor Darul Ta’zim (JDT) berebutka trofi besai nya bulan baru. -EDISI UKAS
