KUCHING: Tuai Jurulatih Kuching City FC (KCFC), Aidil Sharin Sahak nyemetak madah ke tim sida bisi juluk besai ba renggat final Trofi Malaysia 2026.
Taja napi penguji besai ngelaban pengemudi Liga Super, Johor Darul Takzim (JDT) FC di Stadium Bukit Jalil, Aidil madah, nyadi jurulatih, udah juluk iya menang enggau nyadi champion.
Iya nerang, nyadi jurulatih ari menua bukai datai kitu, iya seruran deka mandangka siti pemujur ke alai tim sida ulih nyulut agi ari ke bukai.
“Ditu mih pengeransing ati besai reti laban kami deka ngelaban tim besai, JDT.
“Aku ngarap ke semua orang teperindang meda main bol lalu sehari tu, kitai mai pengerichah tu ke Bukit Jalil ngambi kitai ulih meda dua tim besai belaban di final," ku iya.
Iya nyebut jaku nya ba aum media pengudah pekit KCFC ngelaban Selangor ba renggat semifinal kedua Trofi Malaysia di Stadium Negeri Sarawak, Hari Enam.
Ngenang pekit malam nya, iya muji tim diri ti bemain enggau manah kelebih agi pengudah gol tunggal Petrus Shitembi ba minit ke-30.
Ku iya, Selangor FC ti lenyau dua pemain ba renggat kedua tetap tetap ngansak KCFC ngiga gol.
Nya alai iya enggau tim patut belajar baka ni ngatur main maya diansak, enggau main enggau ati lantang baka selama.
“Kami bisi mayuh peluang, aku ngasai bisi dua kali kena tiang sehari tu. Enti nitih, lebih ari siti gol, tang menang tetap menang.
“Tu pengawa ti manah meri pengandal ngagai pemain bulih lumur dua liga,” ku iya.-EDISI UKAS
