KCFC Enggai Terunda, Ngining Slot Kedua Liga Super, Juluk Kelang Asia
KUCHING: Taja mujur tama final Trofi Malaysia, Kuching City FC (KCFC) enggai terunda lalu terus meri perati penuduk kedua Liga Super 2025/2026 ngiga slot ke renggat Asia.
Tuai Jurulatih KCFC Aidil Sharin Sahak madah, sehari tu besai reti dirami tang tuju patut diperati maya pulai ngagai kem latih dikena ngulihka penuduk kedua liga.
Iya nerang, juluk udah tu mai Sarawak enggau KCFC ke tikas tinggi agi, bemain ba renggat ASEAN enggau Asia.
“Tentu mega, aku deka mai KCFC ke ACL Cup tauka ACL Elite laban tu enda pekit pemadu manah.
“Kitai meda Johor Darul Takzim (JDT) FC mega main enggau manah, nya alai kami deka nunda singkang ti manah baka JDT.
“Ngarap ke kami ulih nyingkang sesingkang da laban ukai muntang nyapai pemujur ba maya ti serekat,” ku iya.
Iya nyebut pekara nya ba aum media pengudah tembu main renggat semifinal kedua KCFC ngelaban Selangor di Stadium Nengeri Sarawak, Hari Enam.
Ngenang pemujur malam tadi, Aidil madah, pemujur nya dirami ari pengelelak bala pemain enggau raban pengatur ti mujur nyagu nama KCFC kandang dua taun tu.
Nikal ke kenang terubah di KCFC, Aidil madah ke suba semina 100 ke 200 orang datai meda, tang bala pemain ti bekaliber ngasuh stadium semampai bededat.
“Tu semua asil penyulut bala pemain ke alai sida ransing ati enggau bisi juluk kenyau ari sebedau musin ke final Trofi Malaysia.
"Presiden KCFC (Dato Fazzrudin Abdul Rahman) mega deka ke nya, lalu aku ngasai ke pemain meri tepa berega malam tu," ku iya. -EDISI UKAS
