Tun Pehin Sri Dr Wan Junaidi, Premier Sarawak Meri Sukung Ngagai KCFC
KUCHING: Yang di-Pertua Negeri Sarawak Tun Pehin Sri Dr Wan Junaidi Tuanku Jaafar sereta Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg meri sukung tegut ngagai Kuching City FC (KCFC) lebuh ngelaban Selangor FC ti datai nandang ba renggat semifinal Trofi Malaysia di Stadium Negeri Sarawak, Hari Enam.
Penatai kededua pemesai Sarawak nya meri sukung tegut sekumbang main diatur lalu seruran gagit meda gaya bala pemain pemain KCFC ti ngasingka ati ransing lebuh bemain.
Dua tim bela mandangka main ti ngasuh ati seduai enggau bala mayuh ti sama datai meda seruran kesal lalu tetiap kali deka nyerang mujur disekat Selangor FC ngasuh semua orang berasai lantang.
Tun Pehin Sri Dr Wan Junaidi sereta Premier Sarawak mega manjung gaga tetiap kali KCFC nyerung ngagai pintu gol Selangor FC.
KCFC mujur ngalahka Selangor FC 1-0 ti ngasuh sida masuk final Trofi Malaysia ti keterubah ba sejarah kelab nya.
Gol ba minit ke-30 ari Petrus Shitembe ngasuh KCFC bulih tikit ke renggat final trofi besai main bol menua nya.
Tembu pekit nya, bala pemain sama ngepai bala pemesai ti datai meri sukung sereta sama manjung gaga meda pemujur bala pemain.
Sama datai, bini TYT Sarawak Toh Puan Datuk Patinggi Fauziah Mohd Sanusi, anak Premier Sarawak Dayang Norjihan Datuk Patinggi Tan Sri (Dr) Abang Abdul Rahman Zohari, Menteri Nembiak, Lumba enggau Pemansang Orang Dagang Sarawak Dato Sri Abdul Karim Rahman Hamzah, Sapit Menteri ba Opis Premier Sarawak (Pekara Korporat, Pemadah enggau UKAS) Datuk Abdullah Saidol, Tuai Sekretari Politik Premier Sarawak ke mega Presiden KCFC Dato Fazzrudin Abdul Rahman, Luyar Besai Sarawak Dato Sri Saferi Ali sereta pemesai bukai. -EDISI UKAS
