KUCHING: Pekit Muaythai Trofi Tuan Yang Terutama (TYT) Yang di-Pertua Negeri Sarawak Edisyen Ke-10 enggau Trofi Borneo 2026 diperati nyadi kelang besai negap pemansang main belaban sereta ngeranchak ekonomi enggau dagang temuai nengeri.

Datuk Bandar Kaunsil Mengeri Kuching Utara (DBKU), Dato Hilmy Othman madah, pekit besai diatur di Kuching Waterfront nya ukai semina ngempuruka atlit lokal aja, tang matak pemekit antarabansa ari lima menua iya nya Indonesia, Brunei, Filipina, Thailand enggau Singapura.

Ku iya, 350 atlit ti ngambi bagi ba pekit nya meda udah ngangkatka penuduk Kuching nyadi kelang lumba antarabansa di rantau tu,

“Pekit tu mega ngatur Trofi Borneo ti keterubah mandangka siti pemujur ngerembaika rentayan kerejasama serantau sereta nyendiaka kelang pekit kompetitif agi,” ku iya bejaku ba mua mayuh rambau pekit nya, Hari Enam.

Iya madah baru, DBKU seruran ransing nyukung pemansang lumba enggau main nyadi pelasar nempa komuniti bepengerai, bisi disiplin enggau ulih besemekih seriris enggau juluk ngangkatka mengeri Kuching nyadi mengeri besai ti regas enggau lantang endur diau.

Ba pekit nya, champion Trofi TYT Sarawak dipenggi Sting Muay Thai Club Kuching, lumur dua Muay Thai Kenyalang, Ketiga Rentap Muay Thai.

Seraya champion Trofi Datuk Bandar DBKU diempu Rentap Muay Thai.

Iya nyemetak madah ke pekit lumba diatur belama ulih meri empas positif ngagai ekonomi nengeri ari nambahka aktiviti dagang temuai enggau belanja domestik.

Iya mega ngansak bala atlit mandangka semangat main tinggi, bisi disiplin enggau ngena kelang nya ngiri penemu enggau nambah peneleba sereta negut kaul entara pemekit mayuh menua.

“Menang tauka alah belakang kira, tang peneleba enggau kaul ti ditanggam nya ti besai reti,” ku iya. -EDISI UKAS