KUCHING: Lebih 80 kelab nembiak enggau serakup lumba ari selampur Sarawal ngulu sesyen randau ba Kompleks Nembiak enggau Lumba Nengeri Sarawak ditu kena Hari Empat ti berandauka pengawa mutar pekara ti nyadi enggau akses ngagai bantu belanja.
Sesyen nya nyadi pelasar beguna endar ngagai raban opis menteri ninga pemar ditapi raban kelab nembiak enggau serakup lumba, kelimpah ngedut takah komunikasyen entara perintah enggau komuniti lumba.
Randau nya mega negapka pengawa nentuka pemansang lumba ba nengeri tu dipejalai inklusif, berurun enggau besai empas.
Entara batang randau iya nya bekunsi penerang bekaul belanja enggau bantu nengah Opis Menteri Nembiak enggau Lumba nengah Komiti Besai Lumba sereta Opis Pengerejista Gerempung Nembiak nyengkaum atur peminta enggau atur patut ti udah ditetap.
Taun tu, bantu belanja mega dikerembai ngagai kelab ti rejista dikuasa Opis Pengerejista Gerempung bepanggai ba sekeda atur.
Sesyen randau baka nya diatur diperati pengawa strategik ninga sada peminta kelab nembiak enggau serakup lumba, lalu negap ekosistem pemansang lumba nengeri sereta nentuka akses bantu belanja ti asi enggau nyerangkung semua.
Kelimpah ari nya, sesyen nya mega meri awak ngagai bala penyereta mantai perambu, minta penerang silik bekaul bantu belanja sereta negap kerejasama strategik dikena nambah penemban pejalai program lumba di Sarawak.
Sesyen randau nya digulu Sapit Menteri Nembiak enggau Lumba, Mordi Bimol.-EDISI UKAS
