CHINA: Kaunsil Mengeri Padawan (MPP) terus negap rentayan antarabansa pengudah nyain Sempekat Kaul Mengeri Bebakih begulai enggau Mengeri Huangshi, Wilayah Hubei, Republik Rakyat China, dikena nanggam kerejasama strategik mayuh sektor nuju pemansang meruan.
Sempekat ti ditanggam ba The Camphor Garden Reception Hall, Huangshi nya lambang komitmen meruan kededua mengeri dikena ngerapit kaul ti udah lama ditanggam kenyau ari taun 2018 seraya ngerandang peluang baru kerejasama dinamik agi enggau empas besai.
Pengawa nyain sempekat nya dipenyadi Chairman MPP, Cr Tan Kai dan Datuk Bandar Huangshi, Wu ZhiLing, sereta dikemata deligit kededua pengari.
Bela datai, Sekretari Perbandaran MPP, Ir Ts Goh Thiam Ho begulai enggau raban deligit, seraya raban Huangshi diari ke bala pemesai kanan nyengkaum Sapit Datuk Bandar, Guo Bao sereta sekeda direktor opis besai.
Kerejasama nya meri perati ngagai bidang betukar rasmi, dagang, pelajar enggau dagang temuai, kelimpah negapka pemun pemansang begulai ti bepuguka prinsip sebela enggau pemaik begulai.
Maya bejaku, Wu ZhiLing madah ke pengandal ngagai pengulih kerejasama besai entara kededua mengeri kelebih agi ngena pengelebih industri Huangshi ti tebilang nyadi hab industri besai enggau pengelebih teknologi tinggi.
Nangkan nya, Cr Tan Kai madah ke pengawa nyain sempekat nya inisiatif signifikan dikena ngerembai rentayan kerejasama antarabansa MPP, kelimpah ngerandang peluang baru ba pemansang ekonomi, pelajar enggau budaya.
Iya mega meri terima kasih ke pemanah sambut raban Huangshi sereta madah ke niat deka negapka agi kaul ba bidang eko-dagang temuai enggau besilih industri, nipak pengulih Padawan nyadi palan ti kaya enggau bemacham budaya enggau pengeraja asal.
Sekumbang nemuai, deligit MPP mega nemuai ngagai institusyen pelajar enggau industri besai nyengkaum Hubei Normal University enggau Hubei Polytechnic Institute.
Penemuai tu meri peneleba ngagai model kerejasama rat entara institusyen pelajar tinggi enggau industri menua ba pemansang penau, ti bisi pengulih nyadi malin ba Padawan.
Pia mega, tikas pemansang teknologi tinggi ba dagang di Huangshi mega nyendia peluang dikena nambah pengawa betukar dagang entara serikat kededua mengeri.
Nengah pengawa nyain sempekat nya, MPP enggau Huangshi keran terus nyerungkai peluang baru ti ulih ngeranchak pemansang ekonomi, negap pemansang rama sereta majak ngerapit kaul antarabansa. - EDISI UKAS
