MERADONG: Projek nyeruri Taman Rekreasyen Bintangor beungkus RM4 juta dipeda nyadi penyungkak nambah kualiti idup komuniti nengah pengawa nyendia perengkaguna mensia mayuh ti likun, lantang enggau ngelantang ati penguna.

Kaban Kunsil Nengeri (ADUN) Meradong, Datuk Ding Kuong Hiing madah, pejalai projek nengah Agensi Pemansang Delta Rajang (RADDA) nya mega dikena ngemanah pasar Bintangor sereta bisi pengulih marit mayuh agi pengusung.

Iya madah munyi nya lebuh ngatur pejalai ngabas projek nya kedua kali pengudah pengawa nyerah taba projek kena 5 Januari tu tadi.

Ku iya, tuju pejalai ngabas nya nentuka pejalai projek lanchar nitih langgur kelimpah berati kediri pejalai projek nyeruri ti benung dipejalai.

Ba pejalai nya, iya mega ngabas mayuh komponen projek nyengkaum agu ti udah diseruri dikena nyaga pengelantang mensia mayuh.

Pia mega, pengawa nyeruri litar jalai besai taman mega dipejalai dikena nyamin pengelikun penguna kelebih agi ungkup aktiviti belepa baka bejalai enggau sesais.

Bisi mega diperati iya nya pengawa ngaga struktur baru baka Jematan Merah ti disadang nyadi pematak ikonik taman nya kelimpah ngaga panggau ba tetengah taman dikena nyukung mayuh aktiviti ngaul komuniti.

Kelimpah ari nya, pemansang taba bemain nembiak mit benung diadu dikena nyendia fasiliti rekreasyen ti ngelantang ruang bilik.

Datuk Ding nyemetak madah ke projek nya entara inisiatif beguna negap perengkaguna mensia mayuh ba menua pesisir lalu meri pemaik timpuh panjai ngagai komuniti.

Iya mega ngarap semua raban bekaul ulih nentuka projek digaga enggau tembu nitih taga lalu nyaga kualiti kereja. - EDISI UKAS