SIBU: Yang di-Pertua Negeri Sarawak Tun Pehin Sri Dr. Wan Junaidi Tuanku Jaafar nampung pejalai ngabang serimbai Hari Raya Aidilfitri lebuh ngundang tuai komuniti enggau peranak ditu, sehari tu.

Disempulang bini, Toh Puan Datuk Patinggi Fauziah Mohd Sanusi, sida ngepun pejalai ngabang ngagai rumah Temenggong Dato Sri Wan Hamid Edruce di Jalai Jasmin pukul 10 pagi.

Penatai seduai diambat Dato Sri Wan Hamid sereta bini, Datin Sri Sharifah Zaidah Syed Abdul Aziz enggau sida sebilik sereta peranak ti datai ngerichah pengawa nya.

Bela nyempulang iya nya Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Hamzah sereta bini, Datin Sri Zuraini Abdul Jaabar enggau Kaban Kunsil Nengeri (ADUN) Katibas, Lidam Assan.

Sama datai, Residen Bagi Menua Sibu Abang Mohamad Porkan Abang Budiman, Temenggong Dato Vincent Lau Lee Ming enggau Temenggong Stanley Geramong Bandar.

Udah nya, sida nampung pejalai ngabang ngagai rumah ex-Kaban Parlimen Igan, Dato Sri Abdul Wahab Dolah di Jalai Kampung Nangka urung pukul 11 pagi.

Kelimpah diambat Dato Sri Abdul Wahab enggau bini, Datin Sri Roesah Adai, penatai Tun Pehin Sri Dr. Wan Junaidi mega diambat Tuai Pegawai Eksekutif Kumpulan Syarikat Ta Ann Datuk K.H Wong sereta beratus peranak ti enda masau peluang berandau enggau iya. - EDISI UKAS