Agih Belanja RM362,600 Ngerichah Pengerami Ngintu Aidilfitri Di Spaoh
SPAOH: Pengerami Hari Raya Spaoh 2026 nyadi pelasar engkeman negut penyerakup pupu bansa lalu nyukung agenda pemansang meruan ba Spaoh.
Pengerami ti ngempuru urung 600 peranak ba Balai Komuniti Spaoh nya udah dipenyadi Sapit Premier Sarawak ti mega Menteri Pekara Wang enggau Ekonomi Baru sereta Menteri Infrastruktur enggau Pemansang Penyangkai Kapal Sarawak, Datuk Amar Douglas Uggah Embas ti nyadi Kaban Kunsil Nengeri (ADUN) Bukit Saban begulai enggau bini, Datin Amar Dato Doreen Mayang.
Ku iya, peneguh Sarawak bepanggai ba penau rayat idup lantang begulai entara pupu bansa enggau budaya seraya nyadi pugu penegap enggau pemansang nengeri.
Iya mega nyemetak madah, Perintah Sarawak keran negap pemansang nyerangkung sektor infrastruktur, ekonomi enggau perengkaguna pemun dikena nyamin pengelantang rayat.
Ku iya, projek infrastruktur besai baka ngaga Jematan Batang Lupar 2 deka negap rentayan penyambung entara Spaoh, Betong enggau Sri Aman, lalu ngeranchak aktiviti ekonomi menua.
Berebak enggau nya, iya madah ke perintah nengeri naka ulih negika hak Sarawak nengah Sempekat Malaysia 1963 (MA63) sereta negap pengawa matau pemansut ekonomi strategik.
Iya mega ngingatka mensia mayuh semampai bejaga maya hari angat dikena nyeliah penusah angus sereta ngatur belanja enggau manah maya betapika gaya ekonomi global ti enda tentu.
Ba pengerami nya, iya mega nyua chek sepenyampau RM362,600 ngagai komuniti Melayu Spaoh ti meri pemaik ngagai 942 Tuai Bilik (KIR), empat Komiti Pemansang enggau Pengelikun Genturung Pendiau (JKKK), Masjid Darul Syifa sereta 10 surau dia.
Nangkan nya, Kaban Parlimen Betong, Dato Dr Richard Rapu madah, Aidilfitri nya lambang penyerakup ti ngerapit kaul entara komuniti.
Iya mega nyemetak madah ke pemesai guna pelajar enggau pemansang ekonomi nyadi pemun nambah tikas idup rayat, kelimpah ngingatka mensia mayuh bejimat macha pengerembai berita ti enda ditemu pengamat ti ulih ngeruga penyerakup.
Pengerami diatur Komiti Pengatur Pengerami Ngabang Raya Spaoh 2026 nya mega digulu tuai menua, tuai opis sereta mensia mayuh. - EDISI UKAS
