SIBURAN: Bisi 84 penerima ari enam genturung pendiau ba pelilih Siburan enggau Tebedu nerima bantu nengah Program Nyua Bantu Belanja enggau Baucher diatur Gerempung Anak Bulan Mirah Malaysia (PBSMM) Pampang Serian, ti diatur ba Balai Tapah, Hari Enam.
Menteri Pelajar, Inovasyen enggau Pemansang Penau Sarawak, Dato Sri Roland Sagah Wee Inn nerang ke program nya ti keterubah diatur ba Bagi Menua Serian enggau entara ti pemadu tumu diatur ba Sarawak.
Ku iya, nya deka negutka agi semangat voluntia entara komuniti, kelebih agi nengah kerejasama PBSMM ti marit serap komuniti nyengkaum nembiak, orang gawa perintah enggau ke bukai.
“Kitai ti nyadi mensia meseti bisi penyiru enggau nyaup pangan diri nadai ngira tirai juru.
“Penusah bah ti nyadi ninting taun meri empas ngagai mayuh orang lalu bantu baka tu besai reti,” ku iya.
Ngenang isu bah, iya ti mega Kaban Kunsil Nengeri (ADUN) Tarat mega madah ke Perintah Sarawak benung berati ke inisiatif timpuh panjai nyengkaum perambu ngaga pegung besai dikena ngurang empas bah, kelimpah pengulih endur nya dikena mansutka kuasa solar dudi hari.
Nangkan nya, Direktor BSMM Sarawak, Chai King Sing, madah ke program nya dikena nyaup komuniti ti napi penusah ketegal bah empai lama nengah pengawa meri bantu belanja tauka baucher.
Ku iya, ba Bagi Menua Serian, bisi 178 penerima ari 12 genturung pendiau deka bulih pemaik nengah inisiatif nya.
“Inisiatif tu meri fleksibiliti ngagai penerima dikena nentuka peminta sida baka barang beresi, pemakai enggau perengkaguna ruang bilik, kelimpah nyukung dagang menua,” ku iya.
Ku iya agi, asil berati ke guna pengudah bah tetemu ke bisi tiga pekara diguna iya nya kit pemeresi, kit pengerai enggau perengkaguna ruang bilik. Genap ruang bilik deka nerima baucher berega RM370, ti ulih dikena belabuh ari 7 nyentuk 21 April 2026.
Bela datai, Sekretari Politik Premier Sarawak Damen Rejek enggau pengari Residen Bagi Menua Serian Esther Najoh. -EDISI UKAS
