MIRI: Perintah Sarawak deka ngagihka bantu berindik ari rega barang enggau minyak niki diatu dikena ngelempung tating belanja idup ti majak diasai ke rayat.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, inisiatif nya benung dialus ke ba renggat Kabinet nentuka bantu ti disadung amat meri empas enggau pemaik ngagai rayat.

“Kami deka baum. Aku endang udah madah dalam kabinet, kami deka meri bantu napi penanggul diatu,” ku iya maya dirandau pemberita pengudah Pengerami Makai Lemai Ngintu Genap Taun Ke-60 Jubli Intan SMK Long Lama ditu, Hari Enam.

Premier Sarawak mega madah, penerang rasmi bekaul chara enggau mekanisme bantu nya deka dipadah pengudah pekara nya diputus.

“Kami deka nerang ke pekara nya udah tu,” ku iya.

Sama datai ba pengerami nya, Menteri Pengangkut Sarawak Dato Sri Lee Kim Shin, Sapit Menteri Nembiak, Lumba enggau Pemansang Orang Dagang Sarawak, Datuk Dr Ripin Lamat, Tuai Sekretari Politik Premier Sarawak Dato’ Fazzrudin Abdul Rahman, Kaban Kunsil Nengeri (ADUN) Telang Usan ti mega Patron Gerempung Sekula Sekondari Long Lama, Dato Dennis Ngau, Kaban Parlimen Baram Dato Anyi Ngau, Residen Bagi Menua Miri Galong Luang, Chairperson Gerempung Alumni Sekula Sekondari Long Lama Margaret Uding Nawan sereta temuai bukai. - EDISI UKAS