KUCHING: Pengangkut mensia mayuh meseti diberi perati nyadi entara inisiatif beguna dikena mutar pemar global nyengkaum bekal kusut ereta bepanggai ngagai minyak enggau gas.

Datuk Bandar Majlis Bandaraya Kuching Selatan (MBKS), Dato Wee Hong Seng madah, pekara nya begunaka pengawa mutar enggau andal ke tuai Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg deka bejalaika inisiatif pemadu manah mutar pemar nya.

“Iya (Premier Sarawak) mega nyebut semua opis perintah enggau raban bekaul meseti berundingka pekara tu enggau lenak.

“Kitai meseti meda baka ni kitai deka mutar semua pemar tu laban aku tentu agi mayuh pilih ti ulih diperunding lalu apin laun bejalaika pengawa.

“Aku ngasai ke tu siti pekara ti meseti dipelajar kitai laban lebuh semua raban napi penusah, kitai ngarap dudi hari kitai deka mujur bisi pilih kediri empu lalu nadai agi kelalu bepanggai ngagai bekal ari orang luar,” ku iya.

Iya madah munyi nya lebuh dirandau pemberita pengudah Virtual Earth Hour 2026 di Chagee Taman Sahabat, Hari Enam.

Dato Wee nyemetak madah, penyadi penusah diatu meseti dipelajar ngambi Sarawak ulih nempa penau kediri lalu enda terus kelalu bepanggai ngagai bekal ari luar, ti ulih meri empas besai lebuh penanggul tauka penyarut global nyadi.

Ku iya agi, maya bisi penanggul bekal tauka penusah enda disadang, empas nya ulih diasai ke rayat, nya kebuah Sarawak meseti sedia enggau pilih ti tegap enggau meruan agi dudi hari. - EDISI UKAS

Pemberita : Ahmad Daniel Faiz
Gambar: George Embie