KUCHING: Penanggul ke nyadi bepun ari konflik di Timur Tengah disadang diasai rayat menua tu dalam kandang dua bulan ke deka datai bepun ari ungkus rega minyak, logistik enggau insurans niki ti mai empas ngagai rega barang.

Sapit Menteri Besai Datuk Amar Fadillah Yusof madah, taja pengawa bebaik ulih digaga tang pengawa mulaika pemanah tikas rega kuasa global mengkang bekenaka timpuh ketegal infrastruktur minyak enggau kuasa balat dikeruga.

"Nya alai, rega petrol, diesel enggau minyak bilun deka niki alai kitai ditu mega bela deka ngasaika penanggul tu, rega barang niki laban ungkus logistik enggau insurans nambah.

"Penanggul ari pekara tu nyangka belabuh diasaika kitai dalam dua bulan ke deka datai.

"Stok barang menua kitai agi bisi ba menua tu tang udah tu ila, stok barang baru datai enggau rega baru," ku iya nerang.

Iya madah munyi nya ba Program Jihad Bisnes 2026 ditu, Hari Satu.

Bepun ari nya, Datuk Amar Fadillah madah, perintah benung mansik chara pemadu engkeman nyengkaum meri bantu ngagai orang dagang lebih agi ngagai dagang mit enggau jelan pemesai (PKS) dikena nyaup sida napi ubah nya.

Iya ke mega Menteri Idar Kuasa enggau Transformasyen Ai madah, perintah diatu benung nentuka bekal barang semampai chukup baka minyak enggau kuasa karan laban penanggul bepun ari bekal kuasa tau bendar meri empas ke besai ngagai rayat, dagang enggau sistem pengangkut menua.

"Ketegal nya kitai meseti nemu lalu seraya nya kitai mega nyikap diri, ngatur langgur ngambika kitai enda ngira nama ke deka nyadi kitai ulih nemu baka ni mutarka iya," pia ku iya madah baru. -EDISI UKAS